काठमाडौँ, १० भदौ । रसुवामा आएको भीषण बाढी र त्यसपछि विभिन्न क्षेत्रमा आएको पहिरोका कारण मृत्यु हुनेको संख्या १५७ पुगेको छ ।

प्रहरी प्रधान कार्यालयले बुधबार राति सार्वजनिक गरेको पछिल्लो विवरणअनुसार बाढी तथा पहिरोमा परी विभिन्न जिल्लामा १५७ जनाको शव फेला परेको हो । सबैभन्दा धेरै चितवनमा ६४ जनाको शव भेटिएको छ ।

प्रहरीका अनुसार धादिङमा २७, नवलपरासी पूर्वमा २२, गोरखामा १९, नुवाकोटमा १३, तनहुँमा ९ तथा रसुवामा ३ जनाको शव फेला परेको छ ।

बाढी र पहिरो प्रभावित क्षेत्रमा खोज तथा उद्धारका लागि ३ हजार ३१८ प्रहरी परिचालन गरिएको छ ।

विपद्का क्रममा विभिन्न प्रहरी कार्यालयमा कार्यरत २८ जना प्रहरी कर्मचारी भने अझै सम्पर्कविहीन छन् । उनीहरूको खोजी तथा उद्धार कार्य जारी रहेको प्रहरीले जनाएको छ ।

बाढीका कारण घाइते भएका ४१ जनाको विभिन्न अस्पतालमा उपचार भइरहेको छ ।

त्रिभुवन विश्वविद्यालय शिक्षण अस्पतालमा २० जना, ट्रमा सेन्टरमा ४ जना, वीर अस्पतालमा ३ जना र त्रिशूली अस्पतालमा ९ जना उपचाररत छन् ।

त्यस्तै, नर्भिक अस्पतालमा ३ जना तथा वीरेन्द्र सैनिक अस्पताल र ग्रिन सिटी अस्पतालमा एक–एक जना घाइतेको उपचार भइरहेको प्रहरीले जनाएको छ ।

बाढी प्रभावित क्षेत्रमा सुरक्षाकर्मीको टोली परिचालन गरी बेपत्ता व्यक्तिको खोजी, उद्धार तथा राहत वितरणलाई तीव्रता दिइएको छ ।

पछिल्लो घटनाक्रमसँगै प्रभावित क्षेत्रमा थप उद्धार तथा राहतका लागि सरकारी संयन्त्र परिचालन भइरहेको छ ।