जनकपुरधाम, २२ कार्तिक । विश्वासको मत पाउने आधार नदेखिएपछि मधेश प्रदेशका मुख्यमन्त्री जितेन्द्र प्रसाद सोनलले शनिबार प्रदेशसभाको बैठकमै पदबाट राजीनामा घोषणा गरेका छन् ।

उनले विश्वासको मतका लागि समय मागे पनि माओवादी केन्द्रका दुई सांसदले विद्रोह गर्दै सरकारको पक्षमा मतदान नगर्ने अडान लिएपछि सोनलले राजीनामाको निर्णय गरेका हुन् ।

प्रदेशसभा बैठकमा सभामुख रामचन्द्र मण्डलले मत विभाजन प्रक्रियामा जान थालेपछि मुख्यमन्त्री सोनलले सदनमै उभिएर ‘अब विश्वासको मत नपाउने स्थिति स्पष्ट भएकाले पदबाट राजीनामा दिन्छु’ भन्दै घोषणा गरेका थिए ।

सत्तारूढ गठबन्धनमै रहेका माओवादी केन्द्रका सांसद रहबर अन्सारी र माला कुमारी कर्णले विश्वासको मत नदिने घोषणा गरेपछि सोनलको सरकार अल्पमतमा पुगेको थियो ।

अन्सारीले रोस्ट्रममै उभिएर मधेश प्रदेशसभाको नैतिक धरातल समाप्त भएको भन्दै आफ्नै मुखमा कालो मोसो दल्दै विरोध प्रदर्शन गरेका थिए । उनले कुनै पनि दललाई विश्वासको मत नदिने घोषणा गरे ।

त्यस्तै, सांसद माला कर्णले पनि केन्द्रीय शासनको नियन्त्रणमा आएको भन्दै कुनै दलको पक्षमा मतदान नगर्ने घोषणा गरिन् ।

राजीनामाअघि मुख्यमन्त्री सोनलले विश्वासको मतका क्रममा भावनात्मक सम्बोधन गर्दै सांसदहरूलाई दलगत सीमाभन्दा माथि उठेर संघीयता र लोकतन्त्रको पक्षमा निर्णय गर्न आग्रह गरेका थिए ।

उनले भने, ‘संघीयताको रक्षा र लोकतान्त्रिक मूल्यको जगेर्ना गर्न आज हामी सबै एक ढिक्का हुन आवश्यक छ । प्रदेश र जनताको हितका लागि तपाईंहरूको समर्थन चाहन्छु ।’

सोनलले संघीयता र सुशासनका एजेन्डा लिएर अघि बढ्ने प्रतिबद्धता दोहोर्याउँदै भने, ‘संघीयताको उद्गमविन्दु नै मधेश हो । यसैले मधेशका जनप्रतिनिधिले थप जिम्मेवारीका साथ अघि बढ्नुपर्छ ।’

सभामुख मण्डलले विश्वासको मतका लागि मत विभाजन प्रक्रिया अघि बढाएपछि सोनलले आपत्ति जनाउँदै राजीनामा घोषणा गरेका थिए । उनका अनुसार, ‘मन्त्रिपरिषद्का कुनै सदस्य उपस्थित नभएका बेला सभामुखले मत विभाजन सुरु गर्नु उचित थिएन ।’

प्रदेशसभामा हाल कुल १०४ सांसद छन् । त्यसमध्ये ३ जना निलम्बित छन् । शनिबारको बैठकमा जनस्वराज पार्टीका दुई सांसद अनुपस्थित थिए ।
नागरिक उन्मुक्ति पार्टीले सोनललाई समर्थन गर्ने निर्णय गरे पनि संघीय समाजवादी पार्टीकी सांसद बिमला अन्सारी अनुपस्थित थिइन् ।

जसपा नेपालका नेता तथा पूर्वमुख्यमन्त्री लालबाबु राउतले संघीयतामाथि संघीय सरकारले प्रहार गरिरहेको भन्दै त्यसको संरक्षणका लागि सबै दल एकढिक्का हुनुपर्ने बताएका थिए ।

माओवादी केन्द्रका संसदीय दलका नेता भरतप्रसाद साहले संघीयताको रक्षाका लागि सरकारको पक्षमा मतदान गर्ने निर्णय सुनाएका थिए भने नेपाली कांग्रेसका प्रमुख सचेतक कुँवरकान्त झाले र नेकपा एमालेका प्रमुख सचेतक हरिनारायण महतोले आफ्नो पार्टीले सरकारको विपक्षमा मतदान गर्ने जानकारी दिएका थिए ।

सोनलको राजीनामासँगै मधेश प्रदेश फेरि राजनीतिक अनिश्चिततामा प्रवेश गरेको छ । नयाँ सरकार गठनका लागि दलहरूबीचको सहमति र गठबन्धनको पुनर्संरचना अब प्रमुख विषय बनेको छ ।

राजनीतिक वृत्तमा अहिलेका लागि मधेशको सत्ता समीकरण पुनः कोअलिशनको गणितमा अड्किएको टिप्पणी सुनिन थालेको छ ।