जनकपुरधाम, १७ कार्तिक । मैथिली साहित्यका महाकवि तथा कविकोकिल विद्यापतिको स्मृति दिवस जनकपुरधाममा विभिन्न सांस्कृतिक र साहित्यिक कार्यक्रमहरू आयोजना गरी श्रद्धापूर्वक मनाइएको छ ।

विद्यापति चोकमा भएको स्मृति दिवस समारोहमा वक्ताहरूले विद्यापतिको रचनात्मक योगदान, भाषिक समृद्धि र सांस्कृतिक गौरवलाई स्मरण गर्दै मैथिली भाषाको संरक्षण र व्यवहारिक प्रयोगमा जोड दिए ।

कार्यक्रमका प्रमुख अतिथि लोकतान्त्रिक समाजवादी पार्टी (लोसपा) का अध्यक्ष महन्थ ठाकुरले विद्यापतिको रचनाहरू कालजयी भएको उल्लेख गर्दै भने, ‘विद्यापति एक यस्तो नाम हो जसलाई विभिन्न भाषाका साहित्यकारहरूले आफ्नै भाषाका महाकविको रूपमा सम्मान गरेका छन् ।’

उनले विद्यापतिप्रति साँचो श्रद्धाञ्जली व्यक्त गर्नका लागि मैथिली भाषालाई रोजगारीसँग जोड्नुपर्ने बताउँदै यसका लागि प्रदेश सरकारले ठोस नीति बनाउन आवश्यक रहेको टिप्पणी गरे ।

त्यस्तै, मधेश प्रदेशका मुख्यमन्त्री जितेन्द्र प्रसाद सोनलले विद्यापतिको साहित्यिक योगदानलाई विश्व साहित्यको धरोहरको रूपमा स्मरण गर्दै उनका रचनाहरूमा धार्मिक, सामाजिक र दार्शनिक मूल्यहरू निहित रहेको बताए ।

‘विद्यापति शिवका परम भक्त हुनुहुन्थ्यो, उहाँको परिनिर्वाण कार्तिक धवल त्रयोदशीका दिन भएको तथ्य स्वयंमा सांस्कृतिक महत्व बोकेको छ,’ मुख्यमन्त्री सोनलले भने ।

उनले विद्यापतिको प्रसिद्ध पंक्ति ‘देशिल वयना सवजन मिठा’ उद्धृत गर्दै त्यसले मानवता, प्रेम र सामाजिक सद्भावको गहिरो सन्देश दिन्छ बताए ।

कार्यक्रममा निवर्तमान प्रदेशसभा सदस्य परमेश्वर साहले मैथिली भाषाको विकासलाई व्यवहारिक र आर्थिक जीवनसँग जोड्नुपर्ने आवश्यकता औंल्याए । उनले प्रदेश सरकारले मैथिलीलाई कामकाजको भाषा बनाउने निर्णय गर्नुपर्ने माग पनि गरे ।

विद्यापति स्मृति पर्व समितिका अध्यक्ष त्रिदेव मिश्रको अध्यक्षतामा सम्पन्न कार्यक्रममा विद्यापति ट्रस्टका पूर्वअध्यक्ष चन्द्रमोहन चौधरी, जिउँदो शहीद रामानन्द चौधरी, लोसपाका प्रवक्ता डा. आभास लाभ र प्राध्यापक अवधेश चौधरीलगायत वक्ताहरूले विद्यापतिको जीवन, दर्शन र योगदानबारे मन्तव्य व्यक्त गरे ।

कार्यक्रममा शतकवीर काशीकान्त झा, कवयित्री विभा पाण्डे, आस्था झा र शिवानी मिश्रले विद्यापतिको रचनाबाट प्रेरित कविताहरू वाचन गरे ।