जनकपुरधाम, १२ कार्तिक । मधेश प्रदेशका मुख्यमन्त्री जितेन्द्र प्रसाद सोनलले आगामी कार्तिक २२ गते प्रदेशसभाबाट विश्वासको मत लिने तयारी गरेका छन् । बुधबार साँझ मुख्यमन्त्री निवासमा बसेको सत्तारुढ गठबन्धनका शीर्ष नेताहरूको बैठकले उक्त निर्णय गरेको हो ।

मुख्यमन्त्री सोनलले विश्वासको मतका लागि तयारी सुरु भइसकेको र यसबारे सबै दलहरूसँग समन्वय भइरहेको जानकारी दिएका छन् । उनले भने, ‘हामी जनताले दिएको जनादेशको सम्मान गर्दै प्रदेश सरकारलाई थप सुदृढ बनाउन विश्वासको मत लिँदैछौं । यसमा विपक्षी दलहरूको पनि समर्थन पाउने विश्वास छ ।’

मुख्यमन्त्री सोनलले सत्तारुढ गठबन्धनमा नयाँ रूपमा नागरिक उन्मुक्ति पार्टी र नेपाल संघीय समाजवादी पार्टी समेत सहभागी भएको जानकारी पनि दिए । उनका अनुसार प्रदेशको राजनीतिक स्थायित्व र विकासको निरन्तरताका लागि सबै दलहरूबीच सहकार्य आवश्यक छ ।

गत असोज २९ गते सोनल मधेश प्रदेशका मुख्यमन्त्रीमा नियुक्त भएका थिए । उनले जनता समाजवादी पार्टी नेपाल, जनमत पार्टी, नेकपा माओवादी केन्द्र, नेकपा एकीकृत समाजवादी र लोकतान्त्रिक समाजवादी पार्टी नेपालको समर्थनमा सरकार गठन गरेका थिए ।

हाल गठबन्धनमा जसपा नेपालका १८, लोसपा नेपालका ८, जनमत पार्टीका १३, माओवादी केन्द्रका ९ र एकीकृत समाजवादीका ७ गरी ५५ जना सांसदको समर्थन रहेको छ । प्रदेशसभामा कुल १०५ जना सदस्य रहेका छन् र विश्वासको मतका लागि ५३ मत आवश्यक पर्नेछ ।

मुख्यमन्त्री सोनलले भने राजनीतिक स्थायित्व, विकास र सुशासनलाई सरकारको पहिलो प्राथमिकता बनाउने प्रतिवद्धता व्यक्त गरेका छन् । उनले भने, ‘मधेशको समृद्धि र पहिचानको सवालमा कुनै सम्झौता हुँदैन । हामी सबै दलहरूलाई समावेश गरेर सहमतिको राजनीतिद्वारा प्रदेशलाई अघि बढाउँछौं ।’

विपक्षी दल नेपाली कांग्रेस र नेकपा एमालेलाई पनि मुख्यमन्त्री सोनलले विश्वासको मत दिनका लागि आग्रह गरेका छन् ।