जनकपुरधाम, १४ असार । धनुषाको क्षीरेश्वरनाथ नगरपालिका–८ दिगम्बरपुरका एक युवकको शनिबार दिउँसो मोटरसाइकल दुर्घटनामा ज्यान गएको छ ।

मृतक ३० वर्षीय रामरतन महतो जनकपुरधामबाट महेन्द्रनगरतर्फ जाँदै गर्दा महेन्द्रनगर नजिकै दुर्घटनामा परेका हुन् ।

मधेश प्रदेश ०२–००५ प ८७९५ नम्बरको रातो अपाचे मोटरसाइकलमा तीव्र गतिमा सवार महतो जनकपुर–ढल्केवर सडक खण्डमा अनियन्त्रित भई लडेका थिए । इलाका प्रहरी कार्यालय महेन्द्रनगरका अनुसार दुर्घटनापछि उनको टाउकोमा गम्भीर चोट लागेको थियो ।

घटनापछि गम्भीर घाइते अवस्थामै उनलाई उपचारका लागि ढल्केबरस्थित जानकी मेडिकल कलेज शिक्षण अस्पताल लगिएको थियो । तर, उपचारको क्रममा चिकित्सकहरूले उनलाई मृत घोषणा गरेका छन् ।

दुर्घटनाको कारण तीव्र गति रहेको प्रारम्भिक अनुमान गरिएको छ भने घटनाबारे थप अनुसन्धान भइरहेको प्रहरीको भनाइ छ । मृतक महतोको शव पोष्टमार्टमका लागि अस्पतालमै राखिएको छ ।