जनकपुरधाम, ९ वैशाख । मधेश प्रदेशमा क्रिकेटले पछिल्ला वर्षहरूमा जुन उत्साह र उर्जा भित्र्याएको छ । त्यो बिस्तारै जनकपुरधामको गौरव बन्न थालेको छ । ओली कप जस्तो राष्ट्रिय प्रतियोगितामा मधेश प्रदेशको जित होस् वा एनपीएलमा जनकपुर बोल्ट्सको उपाधि — यी सबैले मधेश र जनकपुरको नाम देशभर चम्काइरहेका छन् ।

तर, यस्तो उत्साहपूर्ण वातावरणमा केही व्यक्तिको अराजक र गैरजिम्मेवार व्यवहारले स्थानीय खेलप्रेमी, खेलाडी तथा आयोजकहरूलाई चिन्तित बनाएको छ ।

जनकपुरधाम उपमहानगरपालिकास्थित बारहबिघामा रहेको क्रिकेट मैदानमा रातिको समयमा मदिरा सेवन गरेर केही व्यक्तिहरूले मैदानमै तोडफोड गर्ने, पिचमा कोदालो प्रहार गर्ने जस्ता आपत्तिजनक गतिविधि दोहोरिन थालेपछि खेल अभियन्ता हरिशंकर साहले प्रहरीमा लिखित उजुरी दिएका छन् ।

साह भन्छन्, ‘हामीले यो पिच कसैको सहयोग विना आफ्नै लगानी र परिश्रमले बनाएका हौं । यहाँ जनकपुरकै बालबालिका र युवाहरू अभ्यास गर्छन् । तर, केही अराजक मानिसले रक्सी खाएर रातको समयमा आएर मैदानमा कोदालो चलाउँछन् । पिच नष्ट गर्छन् ।’

उनका अनुसार यस्तो व्यवहारले न केवल खेलाडीहरूको भविष्यमा चोट पुर्याइरहेको छ, बरु जनकपुरको समग्र खेलकुद संस्कृतिमै धक्का पुर्याइरहेको छ ।

साहले प्रहरीमा लिखित निवेदन दिंदै घटनाबारे छानबिन गरी दोषीमाथि कडा कारबाही गर्न माग गरेका छन् । साथै, उनले बारहबिघा मैदान वरिपरि सुरक्षा निगरानी कडा पार्न र रातिको समयमा मदिरा सेवन तथा अराजक गतिविधिमा संलग्न व्यक्तिहरूलाई नियन्त्रणमा लिन पनि आग्रह गरेका छन् ।

क्रिकेटका कारण जनकपुरमा पछिल्ला वर्षहरूमा खेलकुदप्रतिको जनचासो निकै बढेको छ । निजी स्तरमा बनाइएका पिचहरू, प्रशिक्षण शिविर, विभिन्न प्रतियोगिताहरूले युवाहरूमाझ सकारात्मक ऊर्जा भित्र्याइरहेका छन् । तर, आवश्यक सरकारी संरक्षण र सुरक्षा अभावले यस्तो प्रयासहरूमा बाधा पुर्याउने अवस्था देखिन थालेको छ ।

खेलाडी तथा प्रशिक्षकहरू भन्छन्, ‘हामी आफ्नो लगानीमा क्रिकेटको जग बसाल्न लागिरहेका छौं । तर, प्रशासनको सहयोग नपाए यो जोश स्थायी बन्न सक्दैन ।’

हरिशंकर साहजस्ता अभियन्ताहरूको प्रयासमा बनेका संरचनालाई सुरक्षित गर्न र अराजक तत्वको हर्कत रोक्न स्थानीय सरकारले तत्काल कदम चाल्नुपर्ने माग उठ्न थालेको छ । खेलकुद केवल मनोरञ्जन नभई सामाजिक विकास र युवा सशक्तिकरणको माध्यम पनि हो भन्ने सन्देशलाई आत्मसात गर्दै प्रहरी र जनप्रतिनिधिहरू जिम्मेवार बन्नुपर्ने आवश्यकता औंल्याइएको छ ।

‘जनकपुरले खेलकुदमा गरेको यो प्रगति जोगाउनु हामी सबैको साझा जिम्मेवारी हो,’ साहले भने ।