जनकपुरधाम, ११ चैत । नेपाल कराँते महासंघको दोस्रो वार्षिक साधारण सभा आज सफलतापूर्वक सम्पन्न भएको छ । यस कार्यक्रममा महासंघका अध्यक्ष युवराज लामा, महासंघका प्रतिनिधिहरू, विभिन्न कराते संघका सदस्यहरू, पर्यवेक्षकहरू, विशिष्ट अतिथिहरूको उपस्थिति रहेको थियो ।

सभा उद्घाटन गर्दै प्रमुख अतिथि माला लामासँगै अन्य अतिथिहरूले कराँते खेलको प्रवर्धन र यसको अन्तर्राष्ट्रिय प्रतिस्पर्धात्मकता बढाउने विषयमा गहन छलफल गरेका थिए । सभामार्फत विभिन्न महत्वपूर्ण निर्णयहरू पनि पारित भएका छन् ।

सभाबाट महासंघको विधानमा महत्वपूर्ण संशोधन गरिएको छ । यसमा प्रशासनिक तथा व्यवस्थापन कार्यविधिका साथै राष्ट्रिय टिम तयारी कार्यविधि र राष्ट्रिय कराते एकेडेमीको कार्यविधि पनि अनुमोदित गरिएको छ । यसले नेपालको कराँते खेलको भविष्यलाई व्यवस्थित र सशक्त बनाउन महत्त्वपूर्ण योगदान दिने विश्वास गरिएको छ ।

कार्यक्रममा कराँते खेलाडी एरिका गुरुङलाई ‘हिमालयन वारियर’ उपाधि प्रदान गर्ने निर्णय पारित गरिएको थियो । यो उपाधि एरिका गुरुङको उत्कृष्ट प्रदर्शन र समर्पणको कदर गर्दै प्रदान गरिएको हो । यसले सम्पूर्ण खेलाडी समुदायलाई थप प्रेरणा प्रदान गर्नेछ ।

नेपाल कराँते महासंघका अध्यक्ष युवराज लामाले कार्यक्रम सफलतापूर्वक आयोजना भएकोमा हर्ष व्यक्त गर्दै सबै सहभागिहरूलाई धन्यवाद दिएका छन् । विशेषगरी आयोजक समिति, स्वयंसेवक र सम्पूर्ण कराते परिवारप्रति आभार व्यक्त गर्दै उनले भने, ‘तपाईंहरूको निरन्तर समर्थन र योगदानले नेपाल कराँते महासंघलाई अझ उचाइमा पुर्याउनेछ ।’

कार्यक्रमको उद्देश्य कराँते खेलको उत्थान, प्रवर्धन र राष्ट्रिय तथा अन्तर्राष्ट्रिय स्तरमा प्रतिस्पर्धा गर्न तयार पार्ने लक्ष्यमा केन्द्रित थियो । महासंघले यसबाट प्राप्त हुने निर्णय र मार्गदर्शनको आधारमा आगामी वर्षहरूमा अझ प्रभावकारी कार्यहरूको योजना बनाउने आशा व्यक्त गरेको छ ।