महोत्तरी, २५ चैत । महोत्तरीको मटिहानीस्थित लक्ष्मीनारायण मठका मान महन्थ जगन्नाथ दास वैष्णवलाई प्रहरीले बैंकिङ्ग कसुर मुद्दामा पक्राउ गरेको छ ।

जिल्ला प्रहरी कार्यालय महोत्तरीका अनुसार धनुषाका दिपेन्द्र ठाकुरले दिएको जाहेरीका आधारमा वैष्णवलाई पक्राउ गरिएको हो ।

उनीमाथि करिब १ करोड ३० लाख रुपैयाँ बराबरको बैंकिङ्ग कसुर गरेको आरोप लागेको प्रहरीले जनाएको छ ।

वैष्णवलाई प्रहरी टोलीले मटिहानी नगरपालिका–७ स्थित उनकै निवासबाट नियन्त्रणमा लिएको हो ।

पक्राउपछि आवश्यक कानुनी प्रक्रिया अगाडि बढाउन उनलाई जिल्ला प्रहरी कार्यालय धनुषामा पठाइएको प्रहरीले जानकारी दिएको छ ।

प्रहरीले घटनासम्बन्धी थप अनुसन्धान जारी रहेको जनाएको छ ।