जनकपुरधाम, २४ कार्तिक । मधेश प्रदेशको मुख्यमन्त्री तथा मन्त्रिपरिषद्को कार्यालयमा कार्यरत कर्मचारीमाथि भएको कुटपिट र दुर्व्यवहारको घटनाप्रति प्रदेशका एक सय २१ जना कर्मचारीले संयुक्त रूपमा आपत्ति जनाउँदै दोषीमाथि तत्काल कानूनी कारबाहीको माग गरेका छन् ।

मुख्यमन्त्री नियुक्ति विवादपछि उत्पन्न तनावका क्रममा सोमबार प्रदेश सरकारको कार्यालयभित्रै केही व्यक्तिहरूले तोडफोड गर्दै कर्मचारीमाथि हातपात गरेका थिए । उक्त घटनाले प्रशासनिक गरिमा र सरकारी कर्मचारीको मनोबल दुवैमा ठुलो आघात पु¥याएको भन्दै कर्मचारीहरूले एकमतमा विज्ञप्ति जारी गरेका हुन् ।

मधेशमा नयाँ मुख्यमन्त्री नियुक्तिको विवाद चरममा पुगेको दिन कांग्रेससहित ६ दलका प्रदेश सांसद र कार्यकर्ताहरूले मुख्यमन्त्री कार्यालयमा धावा बोलेका थिए । उनीहरूले कार्यालयभित्र प्रवेश गरी फर्निचर र कागजातहरू तोडफोड गर्नुका साथै केही कर्मचारीमाथि हातपातसमेत गरेका थिए ।

घटनाको भिडियोमा लोकतान्त्रिक समाजवादी पार्टी (लोसपा) का पूर्व प्रदेश सांसद परमेश्वर साह र लोसपा नेता जितेन्द्र झा कार्यालयभित्र कर्मचारीसँग झगडा गर्दै हातपात गरेको देखिन्छ । सो भिडियो सामाजिक सञ्जालमा भाइरल बनेपछि घटनाले थप विवाद उत्पन्न गरेको हो ।

प्रदेश सरकारका विभिन्न मन्त्रालय र कार्यालयमा कार्यरत १२१ जना कर्मचारीले संयुक्त रूपमा जारी गरेको विज्ञप्तिमा भनिएको छ, ‘कर्मचारीमाथि हातपात र दुर्व्यवहारको घटना अस्वीकार्य र निन्दनीय छ । सरकारी कार्यालयको सुरक्षामा प्रश्न उठ्नेगरी भएको यस्तो कार्यले प्रशासनिक कामकाज प्रभावित भएको छ ।’

विज्ञप्तिमा घटनामा संलग्न सबै व्यक्तिहरूलाई छानबिन गरी तत्काल कानूनी कारबाही गर्न माग गरिएको छ । साथै, भविष्यमा यस्ता घटना दोहोरिन नदिन सुरक्षा व्यवस्था कडा पार्न प्रदेश सरकार र गृह मन्त्रालयलाई आग्रह गरिएको छ ।

कर्मचारीहरूले घटनाको निष्पक्ष छानबिन र दोषीमाथि कारबाही नभए कार्यालयका सबै काम रोक्ने चेतावनी दिएका छन् । उनीहरूले प्रदेश सरकारको मौनताप्रति पनि असन्तुष्टि जनाएका छन् ।

‘हाम्रो माग सम्बोधन नभए र दोषीमाथि कानूनी कारबाही नभए, कार्यालयका सबै प्रशासनिक कार्यहरू ठप्प पारिनेछ,’ विज्ञप्तिमा उल्लेख गरिएको छ ।

यता, जिल्ला प्रशासन कार्यालय धनुषाले घटनाबारे प्रारम्भिक तथ्य संकलन भइरहेको र दोषी पत्ता लगाएर कानूनी प्रक्रिया अघि बढाइने जनाएको छ । प्रशासनले सरकारी सम्पत्तिको तोडफोड र कर्मचारीमाथि हातपात दण्डनीय अपराध भएको स्मरण गराउँदै सबै पक्षलाई संयम अपनाउन आग्रह गरेको छ ।

मुख्यमन्त्री नियुक्तिलाई लिएर मधेश प्रदेशमा बढ्दो तनावले प्रशासनिक र राजनीतिक वातावरण नै तातिएको छ । सरकारी कार्यालयभित्रै हिंसात्मक घटना भएपछि प्रदेश राजधानी जनकपुरधाममा सुरक्षा सतर्कता बढाइएको छ ।