जनकपुरधाम, २० कार्तिक । देशको बदलिँदो राजनीतिक परिस्थितिका कारण पछिल्लो पटक सारिएको नेपाल सर्प महोत्सव तेस्रो संस्करण अब यही कार्तिक ३० र मंसिर १ गते पुनः पूर्वनिर्धारित स्थानमा नै आयोजना हुने भएको छ ।

यो वर्षको महोत्सव मिथिला वाइल्डलाइफ ट्रष्ट र सेभ द लाइभ्सको संयुक्त पहलमा धनुषा जिल्लाको मिथिला विहारी नगरपालिका–२ र ३ स्थित जनमुक्ती चौक नजिक जनकपुरधाम–धनुषाधाम सडकखण्डको उत्तरतर्फ हुनेछ ।

कार्यक्रम बिहान १० बजेदेखि बेलुकी ४ बजेसम्म सञ्चालन हुनेछ । आयोजक संस्थाहरूका अनुसार यस वर्षको महोत्सव ‘सर्पको महत्व बुझौं, सहअस्तित्वलाई सम्मान गरौँ, संरक्षणमार्फत भविष्य सुरक्षित गरौँ’ भन्ने मूल नारासहित मनाइनेछ ।

आयोजक संस्थाका अध्यक्ष देव नारायण मण्डलका अनुसार सर्पहरूलाई अझै पनि अन्धविश्वास र डरको प्रतीकका रूपमा हेरिन्छ । यसले सर्प संरक्षणलाई चुनौती बनाएको छ ।

‘सर्प केवल डस्ने जीव होइन, यो पारिस्थितिकी सन्तुलनको अभिन्न अङ्ग हो । यो महोत्सवले सर्पको पारिस्थितिक, धार्मिक र सांस्कृतिक महत्त्वबारे समाजमा चेतना फैलाउनेछ,’ उनले भने ।

उनका अनुसार महोत्सवमा विद्यालयका विद्यार्थी, स्थानीय निकायका प्रतिनिधि, वातावरणविद्, पशु चिकित्सक र समुदायस्तरका अगुवाहरूको सहभागिता रहनेछ ।

कार्यक्रममा सर्पको जीवनचक्र, विषका प्रकार, सर्पदंशपछिको उपचार प्रक्रिया, तथा ‘रेस्क्यू एण्ड रिह्याबिलिटेसन’ सम्बन्धी व्यवहारिक प्रदर्शन गरिनेछ ।

तेस्रो संस्करण मिथिलेश्वरको जनमुक्ती चौकदेखि ३०० मिटर उत्तरसम्मको क्षेत्रलाई प्रदर्शनी स्थलका रूपमा तयारी भइरहेको आयोजकहरूले जनाएका छन् ।

महोत्सवमा सर्प संरक्षणसम्बन्धी चित्र प्रदर्शनी, जीवित सर्प प्रदर्शन, बालबालिकाको चित्रकला प्रतियोगिता, विशेषज्ञहरूको अन्तक्र्रिया र सर्प बचाउने टोलीको प्रदर्शन रहनेछ ।

‘सर्पलाई सम्मान गर्ने संस्कृतिलाई पुनर्जीवित गर्न हामी समुदायमै पुग्ने प्रयास गर्दैछौं,’ मण्डलले भने ।