जनकपुरधाम, १८ कार्तिक । सामाजिक सञ्जालमा भाइरल भएको खुट्टा मालिस गर्ने भिडियोपछि सप्तरीको अग्नीसाईर कृष्णासवरन गाउँपालिका अध्यक्ष दिनानाथ चौधरीले पदबाट राजीनामा दिएका छन् ।

उपाध्यक्ष कल्पना चौधरीको कार्यकक्षमा सोफामा सुतेर वडाध्यक्षबाट खुट्टामा मालिस गराएको भिडियो सार्वजनिक भएपछि चौधरी विवादमा तानिएका थिए । विवादपछि चौधरीले ५ असोजमा राजीनामा पत्र बुझाएका थिए र सोही दिन गाउँसभा समेत बसेको थियो ।

राजीनामा पत्रमा चौधरीले लेखेका छन्, ‘म दिनानाथ चौधरी अग्नीसाईर कृष्णासवरन गाउँपालिकाको अध्यक्ष पदमा कार्यरत रही आएकोमा विभिन्न कारणवश सो पदमा निरन्तर कार्य गर्न असमर्थ भएको छु । पदमा आवश्यक दक्षता, समय र ऊर्जा दिन नसकेको महसुस गर्दै स्वेच्छाले नै राजीनामा दिएको छु ।’

पत्रमा उनले आफ्नो अनुभवलाई जीवनको महत्त्वपूर्ण उपलब्धि ठान्ने उल्लेख गर्दै भविष्यमा पनि समाज र गाउँको सेवामा समर्पित रहने प्रतिबद्धता व्यक्त गरेका छन् ।

उनको राजीनामा मंगलबार पालिका उपाध्यक्ष कल्पना चौधरीले स्वीकृत भएको जानकारी दिइन् । मंगलबार बसेको कार्यपालिका बैठकले उनको राजीनामा स्वीकृत गरेको उपाध्यक्षले जनाइन् ।

अध्यक्ष चौधरी एमालेबाट निर्वाचित थिए भने उपाध्यक्ष नेपाली कांग्रेसबाट निर्वाचित भएकी हुन् । ५ असोजमा भएको गाउँसभामा जनप्रतिनिधिहरूबीच विवाद देखिएका कारण बैठक ढिलाइ भएको थियो ।