सप्तरी, १८ कार्तिक । महादेवा गाउँपालिकामा कृषि सडक निर्माण कार्यमा ठूलो अनियमितता र भ्रष्टाचार भएको पुष्टि गर्दै अख्तियार दुरुपयोग अनुसन्धान आयोगले आठ जनाविरुद्ध विशेष अदालत काठमाडौँमा मुद्दा दायर गरेको छ ।

आयोगका अनुसार गाउँपालिका–२ अन्तर्गत दोमुहान डगरदेखि पश्चिम खाडो नदी हुँदै भिमबाँधसम्मको सडक निर्माणमा मिलेमतो गरी बढी भुक्तानी लिइएको पुष्टि भएको हो ।

यससँग सम्बन्धित आरोपीमा कृषि विकास निर्देशनालय धनुषाका कार्यालय प्रमुख रत्न कुमार झा, कृषि विज्ञ विकास कुमार साह, लेखा अधिकृत चक्र प्रसाद अधिकारी, वडा नं. २ का अध्यक्ष जगदीश मण्डल, उपभोक्ता समिति अध्यक्ष हरिनारायण यादव, सचिव गंगाराम यादव, कोषाध्यक्ष सावित्री देवी यादव र किरु इन्जिनियरिङ कन्सल्टेन्टका प्रोपराइटर हरिश कुमार सिंह रहेका छन् ।

आयोगका अनुसार आर्थिक वर्ष २०७७–७८ मा २३ लाख ५२ हजार ८ सय ६९ रुपैयाँ ६ पैसा बजेटमा सडक निर्माण सम्झौता गरिएको थियो । तर, तोकिएको समयभित्र काम सम्पन्न नगरी म्याद थपको निर्णय बिना नै भुक्तानी गरिएको पाइएको छ ।

स्थलगत नापजाँचमा पनि ठूलो घटबढ भेटिएको आयोगले जनाएको छ । नापी किताबमा ४३७.४० क्युबिक मिटर काम उल्लेख भए पनि फिल्डमा केवल २०३.१४ क्युबिक मिटर मात्र सम्पन्न भएको पुष्टि भएको छ । यसरी २३४.२६ क्युबिक मिटरको कमीका कारण करिब ६ लाख ९० हजार रुपैयाँभन्दा बढी सरकारी रकम हिनामिना भएको आयोगले ठहर गरेको छ ।

अख्तियारले यस मामिलामा भ्रष्टाचार निवारण ऐन, २०५९ अनुसार आरोपीहरूमाथि कारबाही र हिनामिन भएको रकम फिर्ता गर्न विशेष अदालतमार्फत माग गरेको छ ।