जनकपुरधाम, ५ कार्तिक । नेकपा (माओवादी केन्द्र)का अध्यक्ष पुष्पकमल दाहाल ‘प्रचण्ड’ले देशका समाजवादी विचारधारामा आधारित राजनीतिक दलहरूबीच एकता प्रक्रियालाई तीव्र रूपमा अघि बढाइरहेको बताएका छन् । उनले छठ पर्वपछि देशको राजनीतिक परिदृश्यमा नयाँ र फरक परिस्थिति देखिने दाबी गर्दै वाम–समाजवादी ध्रुवीकरणको संकेत दिएका हुन् ।

बुधबार जनकपुरधाम विमानस्थलमा सञ्चारकर्मीहरूसँग संक्षिप्त कुराकानी गर्दै प्रचण्डले भने, ‘समाजवादी शक्तिहरूबीच एकताको प्रक्रिया सुरु भइसकेको छ । अब छठ पर्वपछि तपाईंहरूले फरक परिस्थिति देख्नुहुनेछ ।’ उनका अनुसार देशभरका प्रगतिशील, वामपन्थी र समाजवादी दलहरूबीच सहकार्य र एकताका लागि निरन्तर संवाद भइरहेको छ ।

उनले राजनीतिक स्थायित्व, सुशासन र आर्थिक रूपान्तरणका लागि वाम र समाजवादी शक्तिहरू एउटै धारमा उभिनुपर्ने आवश्यकता औंल्याए । ‘देशमा स्थायित्व र आर्थिक रूपान्तरण ल्याउन वाम र समाजवादी शक्तिको साझा सहकार्य अपरिहार्य छ । अहिले हामी त्यसै दिशामा अघि बढिरहेका छौँ,’ प्रचण्डले भने ।

मधेश प्रदेशलाई देशको आर्थिक मेरुदण्डका रूपमा चित्रण गर्दै उनले मधेशको विकासले राष्ट्रको समग्र समृद्धिमा निर्णायक भूमिका खेल्ने बताए । ‘मधेश मुलुकको समृद्धिको ढोका हो । यहाँको विकासले देशको आर्थिक गति तय गर्छ । त्यसका लागि केन्द्र र प्रदेशबीचको सहकार्य अझ मजबुत हुनुपर्छ,’ उनले भने ।

उनका अनुसार छठ पर्वपछि वाम–समाजवादी दलबीच ठूला राजनीतिक निर्णयहरू हुनसक्छन् । यसले देशको राजनीतिक सन्तुलनमा नयाँ दिशा दिनेछ । ‘देशको संकट र राजनीतिक अस्थिरताबाट निस्कन वाम–समाजवादी एकता नै दीर्घकालीन समाधान हो,’ प्रचण्डले जोड दिए ।

अध्यक्ष प्रचण्डले आगामी निर्वाचन तोकिएको समयमा नै हुनुपर्नेमा पनि जोड दिएका छन् । उनका अनुसार सरकार र सबै राजनीतिक दलहरूले अब निर्वाचनतर्फ केन्द्रित हुनुपर्नेछ । ‘निर्वाचन तोकिएको समयमा हुनुपर्छ । सरकारले यसलाई गम्भीरतापूर्वक लिएर निर्वाचनको वातावरण बनाउनुपर्छ,’ उनले भने ।

उनले हालै दलहरूसँग भएको वार्ताबाट सरकार विस्तारै निर्वाचनतर्फ गम्भीर हुँदै गएको महसुस भएको उल्लेख गरे । ‘तर, अझै आवश्यक वातावरण बनेको छैन,’ उनले टिप्पणी गरे ।

प्रचण्डले असाधारण परिस्थितिमा बनेको अन्तरिम सरकारले निर्वाचन घोषणा गरिसकेकाले अब सबै दलहरू त्यसतर्फ केन्द्रित हुनुपर्ने बताए । ‘निर्वाचनमा केन्द्रित हुनुपर्छ भनेर निर्णय गर्ने पहिलो पार्टी माओवादी केन्द्र नै हो,’ उनले दाबी गरे ।

जेनजी आन्दोलनपछि काठमाडौं उपत्यकाबाहिर पहिलो सार्वजनिक कार्यक्रम सञ्चालन गर्ने पार्टी माओवादी केन्द्र नै रहेको उल्लेख गर्दै प्रचण्डले बुधबार महोत्तरीको रामगोपालपुरमा आयोजना भएको पार्टी प्रवेश तथा जनसभा कार्यक्रममा सहभागिता जनाउने बताए ।

उनले वामपन्थी एकता र ध्रुवीकरणबारे स्पष्ट गर्दै भने, ‘निर्वाचन त हुनैपर्छ । र, वामपन्थी एकता र ध्रुवीकरण पनि समाजवादी मोर्चामा रहेका दलबीच क्रमशः अगाडि बढ्दै जानेछ ।’