जनकपुरधाम, १ कार्तिक । जनकपुरधामका वरिष्ठ समाजसेवी ब्रह्मदेव मिश्रले शताब्दी नाघेकी आमा रामरती देवी साहलाई सम्मान गर्दै आशीर्वाद लिएका छन् ।

जनकपुरधाम उपमहानगरपालिका–१४ मुजेलियास्थित उनकै निवासमा आयोजित एक विशेष कार्यक्रममा मिश्रले शताब्दी आमालाई दोसल्ला ओढाई सम्मान गरेका हुन् ।

मिश्रले भने, ‘एक शताब्दीभन्दा बढी जीवन यात्रा पूरा गर्नु आफैंमा प्रेरणादायी उदाहरण हो । माताजीको आशीर्वाद र उहाँको सेवाभावको भावना हाम्रो समाजका लागि अमूल्य सम्पत्ति हो ।’

उनले ममतामयी आमा रामरती देवीले १०० वर्ष पार गरेको अवसरमा साह परिवारलाई बधाई दिँदै यस्तो सुखद क्षणमा सहभागी हुन पाएकोमा आफूलाई गौरवान्वित महसुस भएको बताए ।

मिश्रका अनुसार वरिष्ठ नागरिक, अभिभावक र शताब्दी आमाप्रतिको सम्मान संस्कारको निरन्तरता हो र यसले समाजमा पारिवारिक र सांस्कृतिक मूल्य सुदृढ गर्न सहयोग पुर्याउँछ ।

शताब्दी आमाको परिचय पनि उत्तिकै प्रेरणादायी छ । जनकपुरधाम विकासका दानवीर स्वर्गीय रामसागर साहकी बुहारी तथा समाजसेवी स्वर्गीय फूलगेन साहकी धर्मपत्नी रामरती देवी साह दीर्घकालदेखि सामाजिक र धार्मिक कार्यमा सक्रिय रहिएकी छन् ।

उनका सुपुत्रहरू प्रभाकर साह, दिवाकर साह र विद्याकर साह समेत सामाजिक सेवा र जनकल्याणमा संलग्न छन् ।

कार्यक्रममा उपस्थित स्थानीय बुद्धिजीवी, समाजसेवी, राजनीतिकर्मी तथा विभिन्न संघसंस्थाका प्रतिनिधिहरूले रामरती देवी साहको दीर्घजीवन, अनुशासन र धर्मप्रतिको समर्पणको प्रशंसा गरेका थिए । सबैले उनको निरन्तर समाजसेवाबाट प्रेरणा लिँदै पारिवारिक र सामुदायिक सद्भावमा योगदान गरेको उल्लेख गरे ।

उक्त अवसरमा रामरती देवी साहले आफ्ना अतिथिहरूलाई आशीर्वादस्वरूप धार्मिक पुस्तक वितरण गरेकी थिइन् । उपस्थित सबैले उनको स्वास्थ्य, दीर्घायु र परिवारको सुख, समृद्धिको कामना गर्दै उनीसँग आशीर्वाद लिएका थिए ।