बारा, १५ भदौ । बाराको सिमरामा वीरगञ्ज–पथलैया सडक खण्ड अन्तर्गत आइतबार दिउँसो दुई मोटरसाइकल एक आपसमा ठक्कर खाँदा २ जनाको मृत्यु भएको छ भने १ जना गम्भीर घाइते भएका छन् ।

वीरगञ्जबाट पथलैयातर्फ जाँदै गरेको बा ९० प ६७९४ नम्बरको मोटरसाइकल र विपरीत दिशाबाट आउँदै गरेको बा प्र ०६–००३ प १७५३ नम्बरको मोटरसाइकल एक आपसमा ठक्कर खाएको हो ।

दुर्घटनामा सप्तरी जिल्लाको विष्णुपुर गाउँपालिका वडा नम्बर–७ निवासी २८ वर्षीय महेश पण्डित गम्भीर घाइते भएका थिए । उनलाई उपचारका लागि वीरगञ्जस्थित एसएल न्युरो अस्पताल लगिएको थियो । तर, अपराह्न ३ बजे उपचारको क्रममा उनको मृत्यु भएको बारा प्रहरीले जानकारी दिएको छ ।

त्यस्तै, सोही दुर्घटनामा गम्भीर घाइते रौतहटको गुजरा नगरपालिका वडा नम्बर–७ निवासी २५ वर्षीय रोशन चौधरीको कलैया अस्पतालमा उपचारका क्रममा अपराह्न ३ः३० बजे मृत्यु भएको प्रहरीले जनाएको छ ।

दुर्घटनामा घाइते भएका रौतहटको गुजरा नगरपालिका वडा नम्बर–७ का ३४ वर्षीय भूपेन्द्र चौधरीको उपचार वीरगञ्जस्थित एसएल न्युरो अस्पतालमा भइरहेको छ ।