वीरगञ्ज, १५ भदौ । गृहमन्त्री रमेश लेखकले पर्सा र बारा जिल्लाको शान्ति–सुरक्षा अवस्थाबारे आइतबार जिल्ला प्रशासन कार्यालय पर्सामा बसेको सुरक्षा समितिको बैठकमा प्रमुख सुरक्षा निकायका प्रतिनिधिसँग विस्तृत छलफल गरेका छन् ।

तीन दिनको कार्यतालिकासहित वीरगञ्ज आइपुगेका गृहमन्त्री लेखकले पर्सा र बाराको समग्र सुरक्षासम्बन्धी चुनौतीबारे प्रत्यक्ष जानकारी लिँदै सीमा अपराध, लागुऔषध कारोबार, धार्मिक गतिविधि र राजश्व चुहावटका विषयमा चासो देखाएका हुन् ।

बैठकमा पर्साका प्रमुख जिल्ला अधिकारी तोयनारायण सुवेदीले जिल्लामा भइरहेको सुरक्षासम्बन्धी गतिविधि, राजश्व चुहावट र सीमावर्ती समस्याबारे गृहमन्त्रीलाई जानकारी गराए । साथै नेपाल प्रहरी, सशस्त्र प्रहरी, भन्सार, राजश्व विभाग र अन्य सरोकारवाला निकायका प्रमुखहरूले समेत गृहमन्त्रीलाई विस्तृत ब्रिफिङ प्रस्तुत गरेका थिए ।

बैठकपछि पर्सा प्रहरीले दिएको जानकारीअनुसार गृहमन्त्री लेखकले सुरक्षा निकायका प्रमुखहरूलाई ‘शून्य सहनशीलता’ अपनाएर काम गर्न निर्देशन दिएका छन् । एसपी गौतम मिश्रका अनुसार गृहमन्त्रीले सीमा अपराध, चोरी–तस्करी र राजश्व चुहावट नियन्त्रणमा कडाइ गर्न आदेश दिँदै धार्मिक सहिष्णुता कायम राख्न विशेष ध्यान दिनुपर्ने बताएका छन् ।

लेखकले भारतीय नम्बर प्लेटका सवारी साधनलाई चेकजाँचको नाममा अनावश्यक दुःख नदिन पनि सुरक्षा निकायलाई सचेत गराएका छन् । उनले जनसामान्यलाई सहज वातावरणमा बसोबास गर्न दिनु सरकारको जिम्मेवारी भएको भन्दै सुरक्षामा कुनै पनि प्रकारको कमजोरी नदेखाउन निर्देशन दिएका थिए ।

बैठकमा कानुन, न्याय तथा प्रदेशसभा मामिला मन्त्री अजयकुमार चौरसिया, खानेपानी, सरसफाइ तथा सिँचाइ मन्त्री प्रदीप यादव, नेपाल प्रहरी, सशस्त्र प्रहरी, भन्सार कार्यालय, राजश्व विभागका प्रमुखहरूलगायतका अधिकारीहरूको उपस्थिति थियो ।

गृहमन्त्री लेखक सोमबारसम्म वीरगञ्जमै रहने कार्यतालिका रहेको नेपाली कांग्रेस पर्साले जनाएको छ ।