जनकपुरधाम, २५ साउन । यस साता परेको भारी वर्षा र त्यसपछिका नियमित सामान्य वर्षाका कारण मधेश प्रदेशमा धान रोपाइँ भएको क्षेत्रफल करिब दोब्बर बढेको छ ।

प्रदेशभरि साउन १६ गतेदेखि २३ गतेसम्मको सात दिनको अवधिमा धान रोपाइँ क्षेत्रफल ३३.८१ प्रतिशतले वृद्धि भएर अहिलेसम्म कुल खेतीयोग्य जमिनको ७६.५४ प्रतिशतमा रोपाइँ भइसकेको छ । यो तथ्यांक कृषि विकास निर्देशनालय नक्टाझिझले सार्वजनिक गरेको हो ।

गत साउन १६ गतेसम्म मधेश प्रदेशमा कुल ४२.७३ प्रतिशत हेक्टर क्षेत्रफलमा मात्र धान रोपाइँ भएको थियो भने हाल एक हप्तामा मात्र ३३.८१ प्रतिशत क्षेत्रफलमा धान रोपाइँ थपिएको छ । यसअघि मध्य साउनसम्म कुल खेतीयोग्य जमिनमध्ये ५७.२७ प्रतिशत क्षेत्रमा मात्रै रोपाइँ बाँकी थियो । अहिले त्यो घटेर २३.४६ प्रतिशतमा सीमित भएको कृषि निर्देशनालयका प्राविधिक सहायक प्रतिभाकुमारी यादवले जानकारी दिइन् ।

धान रोपाइँमा आएको यो बढोत्तरीका कारण किसानहरू खुसी भएका छन् । कमलाका किसान हरिचरण यादवले भने, ‘पानी परेको कारण सबै काम थाती राखेर हामी धान रोप्नमा लाग्यौँ । अब खेतमा करिब पाँच कट्ठामात्रै रोपाइँ बाँकी छ । यदि थप पानी पर्छ भने बाँकी खेतमा पनि रोपाइँ गर्न सकिनेछ ।’

अर्का किसान रामसोभित यादवले भने, ‘खेतमा चिस्यान पुगिसकेको छ । तर, धान रोप्ने गरी हिलाउन थप पानीको आवश्यकता पर्छ । नहर, कुलोपैनी, स्यालो ट्युबेल, डिप बोरिङ चलाएर पानी पुर्याउनुपर्ने हुन्छ । आकाशबाटै पानी आए अझ राम्रो हुने थियो ।’

मधेश प्रदेशमा कुल तीन लाख ७२ हजार ६४५ हेक्टर क्षेत्रफलमा धान खेती हुने गर्दछ । यस वर्ष पानीको प्रभावकारी वर्षाले किसानहरूमा उर्जा थपेको छ । धान रोपाइँ बढेसँगै प्रदेशमा कृषिमा समृद्धि र खाद्य सुरक्षाको सम्भावना बलियो हुने किसानहरूले बताएका छन् ।

प्रदेशभरि निरन्तर पानी परिरहँदा कृषकहरू सक्रिय भएर रोपाइँमा लागेको र आगामी समयमा पनि कृषि उत्पादनमा राम्रो वृद्धि हुने सम्भावना रहेको कृषि अधिकारीहरूले बताएका छन् ।