जनकपुरधाम, २४ साउन । लम्पीस्किन रोगको सङ्क्रमणबाट मधेश प्रदेशमा हालसम्म एक हजार सात सयभन्दा बढी पशुचौपाया मरेका छन् ।

प्रदेश सरकारका भूमि व्यवस्था तथा सहकारी मन्त्रालयका अनुसार कुल ५२ हजार ६८६ पशुमा लम्पीस्किन संक्रमण पुष्टि भएको छ ।

मन्त्रालयले संक्रमितमध्ये २३ हजार ७०९ पशु उपचारपछि निको भएको जनाएको छ । लम्पीस्किन रोग लागेका पशुमा प्रारम्भमा ज्वरो आउने, शरीरमा घाउ र चोट देखिने तथा घाँस र पानी खान अनिच्छा देखिने लक्षणहरू देखिन्छन् ।

यसैबीच, रोगको रोकथामका लागि प्रदेशभर खोप अभियान पनि सुरु गरिएको छ । मन्त्रालयका अनुसार अहिलेसम्म दुई लाख ४५ हजारभन्दा बढी पशुलाई खोप लगाइएको छ ।

खोप अभियान अन्तर्गत दुई लाख ३१ हजार ५१५ पशुलाई विज्ञ केन्द्रबाट खोप दिइएको छ भने स्थानीय तहमार्फत धनुषामा ५६६, सर्लाहीमा १७५ र रौतहटमा तीन हजार ७०० पशुलाई खोप लगाइएको छ ।

मन्त्रालयले लम्पीस्किन रोग नियन्त्रणमा खोप कार्यक्रमलाई थप प्रभावकारी बनाउने योजना बनाएको छ ।