सर्लाही, २४ साउन । सर्लाहीको बसबरिया गाउँपालिका–४ र ५ मा जसपा नेपाल परित्याग गरि पूर्व वडाध्यक्ष कमल चौधरी र वर्तमान वडा अध्यक्षका भाइ युवा नेता सुरेश साहको नेतृत्वमा सयौँ कार्यकर्ता नेपाली काँग्रेसमा प्रवेश गरेका छन् ।

पार्टी प्रवेश कार्यक्रम नेपाली काँग्रेस मधेश प्रदेश उपाध्यक्ष तथा पूर्वमन्त्री विरेन्द्र प्रसाद सिंहको प्रमुख आतिथ्यमा सम्पन्न भएको थियो । सिंहले नवप्रवेशीहरूलाई माला, अबीर र गम्छा लगाएर काँग्रेसमा स्वागत गरेका थिए ।

कार्यक्रममा बोल्दै सिंहले नेपाली काँग्रेसलाई लोकतन्त्र र विकासको आधार भने र नवप्रवेशीहरूको आगमनले पार्टीलाई स्थानीय तहमा अझ सबल बनाउने विश्वास व्यक्त गरे ।

पूर्व वडा अध्यक्ष चौधरीले जनताको चाहना र क्षेत्रको समग्र विकासका लागि काँग्रेस प्रवेश गर्ने निर्णय गरेको बताए भने युवा नेता साहले पार्टीको विचार र कार्यशैलीप्रति विश्वासका कारण यो निर्णय गरेको स्पष्ट पारे ।

कार्यक्रममा दर्जनौँ युवा, महिला कार्यकर्ता तथा स्थानीय जनप्रतिनिधिको उल्लेखनीय उपस्थिति रहेको थियो ।