जनकपुरधाम, ३१ असार । मधेश प्रदेश प्रमुख सुमित्रा सुवेदी भण्डारीले मधेश प्रदेशसभाबाट पारित भई प्रमाणीकरणका लागि प्रस्तुत दुई महत्वपूर्ण विधेयकलाई नेपालको संविधानको धारा २०१ को उपधारा २ अनुसार प्रमाणीकरण गरेकी छन् ।

प्रदेश प्रमुखको कार्यालयद्वारा जारी विज्ञप्तिअनुसार प्रमाणीकरण गरिएका विधेयकहरूमा ‘मधेश प्रदेश सरकारको अर्थ सम्बन्धी प्रस्तावलाई कार्यान्वयन गर्न बनेको विधेयक’ र ‘आर्थिक वर्ष २०८२/८३ का लागि मधेश प्रदेश सञ्चित कोषबाट रकम विनियोजन तथा खर्चसम्बन्धी व्यवस्था गर्न बनेको विधेयक’ छन् ।

यी दुवै विधेयक नेपालको संविधानको धारा १९९ अनुसार प्रदेश सभाबाट पारित भई धारा २०१ को उपधारा १ अनुसार प्रमाणीकरणका लागि प्रदेश प्रमुखसमक्ष पेश गरिएका थिए ।

विज्ञप्तिमा भनिएको छ, ‘प्रदेश प्रमुखज्यूले सम्बन्धित विधेयकहरू संविधानमा व्यवस्था गरिएअनुसार आवश्यक प्रक्रिया पूरा गरी प्रमाणीकरण गर्नुभएको छ ।’

प्रमाणीकरणसँगै आगामी आर्थिक वर्षका बजेट तथा आर्थिक कार्यक्रमहरू कार्यान्वयनको बाटो खुलेको प्रदेश सरकारका अधिकारीहरूले जनाएका छन् ।