जनकपुरधाम, ३० असार । धनुषाको नगराईन नगरपालिकामा शिक्षा र प्रशासनिक प्रणालीमा देखिएको लापरवाही, अपारदर्शिता र कमजोर नतिजाप्रति नेकपा (एकीकृत समाजवादी) नगराईन नगर कमिटीले आपत्ति जनाएको छ ।

पार्टीले एक ज्ञापनपत्रमार्फत नगर प्रमुख विनय कुमार यादवलाई १५ दिनको अल्टिमेटम दिँदै सुधार नभए सशक्त आन्दोलनमा जाने चेतावनी दिएको छ ।

सोमबार हस्तान्तरण गरिएको ज्ञापनपत्रमा नगरको शिक्षा क्षेत्रमा देखिएका त्रुटिहरू, आर्थिक अपारदर्शिता र प्रशासनिक कमजोरीबारे विस्तारपूर्वक उल्लेख गर्दै पार्टीले नगर प्रमुखको ध्यानाकर्षण गराएको हो ।

ज्ञापनपत्रमा उल्लेख भएअनुसार, एसईई २०८१ मा नगराईन नगरपालिकाको सफलता दर १९.७०५ प्रतिशत मात्र हुनु शिक्षा प्रणालीको गम्भीर पतनको सूचक भएको बताइएको छ । पार्टीले विद्यालय, नगरपालिका र प्रशासन तीनै तहको जिम्मेवारी निर्धारण गरी तत्काल सुधार योजना ल्याउन माग गरेको छ ।

त्यसैगरी, परीक्षा समयमा विद्यार्थीलाई विधिविपरीत प्रश्नपत्र वितरण नगरी पाटीमा प्रश्न लेखाएर परीक्षा सञ्चालन गरिएको जस्तो अमर्यादित र लज्जास्पद कार्यको छानबिन गरी दोषीलाई कारबाही गर्न माग गरिएको छ ।

यसबाहेक, इन्धन खर्च वर्षेनी अस्वाभाविक रूपमा वृद्धि भए पनि यसको स्पष्ट विवरण नदिइनु, तीन वर्षको योजनागत खर्च विवरण सार्वजनिक नगर्नु र वस्तु खरिद–बिक्रीमा समेत पारदर्शिता नहुनुले जनतामा अविश्वास बढेको भन्दै पार्टीले नगर कार्यपालिकामाथि प्रश्न उठाएको छ ।

यदि १५ दिनभित्र मागहरू सम्बोधन नभए नगर प्रमुखको सरकारी सवारीको साँचो खोस्ने र त्यसपछि चरणबद्ध आन्दोलन थाल्ने पार्टीको चेतावनी छ ।

नेकपा (एकीकृत समाजवादी) नगराईन नगर कमिटी अध्यक्ष आदर्श मण्डलले हस्ताक्षर गरेको उक्त ज्ञापनपत्रमार्फत शिक्षा, पारदर्शिता र जवाफदेहिताको पक्षमा नगरवासीको आवाज बुलन्द बनाउने अभियानलाई पार्टीले निरन्तरता दिने जनाइएको छ ।