जनकपुरधाम, ३० असार । सत्तारुढ लोकतान्त्रिक समाजवादी पार्टी (लोसपा) नेपालका सांसद उपेन्द्र महतोले सरकारप्रति असन्तुष्टि जनाउँदै प्रस्तुत बजेटलाई ‘गुलामी मानसिकताको उपज’ भनेका छन् ।

सोमबार मधेश प्रदेशसभामा बजेटमाथिको सैद्धान्तिक छलफलमा भाग लिँदै उनले योजना निर्माण प्रक्रिया, बजेटको उद्देश्य र पारदर्शितामाथि गम्भीर प्रश्न उठाएका हुन् ।

‘पढ्दै नपढेको, हेर्दै नहेरेको योजनाको बारेमा कसरी छलफल गर्ने?’ भनी सरकारसँग प्रतिप्रश्न गर्दै उनले भने, ‘शोषित भएकोले शोषण गर्दैन भन्छन् । तर, तपाईँहरूले बहुमत, सत्ता र समर्थनको बलमा सबैलाई गुलाम बनाउनु भएको छ ।’

महतोले सरकारले नयाँ रेकर्ड बनाएको भन्दै बजेट निर्माणमा बिचौलियाको हस्तक्षेप रहेको आरोपसमेत लगाए । जनमत पार्टीका अध्यक्ष सीके राउतको निर्वाचन क्षेत्रमै १ अर्ब १५ करोडको योजना विनियोजन भएको उल्लेख गर्दै उनले प्रश्न गरे, ‘बिचौलियामा त तपाईँकै प्रवेश छ कि सरकारभित्रै बिचौलिया छ? सरकारले यसबारे स्पष्ट पार्नुपर्छ ।’

घाटा बजेट प्रस्तुत गरेर प्रदेशलाई आर्थिक संकटमा धकेलिएको आरोप लगाउँदै उनले कटाक्ष गर्दै भने, ‘सरकारको योजना आम्दानी अठन्नी, खर्च रुपैयाँ हो ।’ उनले बजेटले व्यावहारिकभन्दा नारामुखी सोच बोकेको भन्दै ‘उत्पादन मधेशमा, निर्यात देशमा’ भन्ने नाराको पनि खिल्ली उडाए ।

‘जब बजेट जम्मा तीन अर्बको मात्रै छ, त्यस्तो अवस्थामा ‘फिड द नेशन’ होइन, ‘फिड द मिनिस्टर क्याम्पेन’ नाम राखे हुन्छ,’ उनले व्यङ्ग्य गरे ।