जनकपुरधाम, २९ असार । जनमत पार्टीबाट निलम्बनमा परेका राष्ट्रिय उपाध्यक्ष इन्जिनियर दीपक कुमार साह, कोषाध्यक्ष सुरेन्द्र यादव र केन्द्रीय सदस्य वीरेन्द्र साह सुनारमाथि बाराको महागढीमाईमा मोसो छ्याप्नुका साथै प्रज्वलनशील पदार्थ फ्याकेर दुर्व्यवहार गरिएको छ ।

यो घटना पार्टी अध्यक्ष डा. सीके राउत निकट केन्द्रीय सदस्य विकास सिंहको नेतृत्वमा भएको खुलेको छ । उक्त त्रय नेता ‘पार्टी सुदृढीकरण तथा जनसंवाद यात्रा’ अन्तर्गत आइतबार बिहान कार्यकर्तासहित संवाद कार्यक्रममा जाँदै गर्दा महागढीमाई नगरपालिका–३, दहियारमा उनीहरूको सवारी साधनमाथि आक्रमण भएको हो ।

इन्जिनियर साहले यस घटनालाई पूर्वनियोजित हमला ठहर गर्दै डा. सीके राउतले ज्यान मार्ने नियतले आफ्नै पार्टीभित्रका ‘गुण्डाहरू’ परिचालन गरेको आरोप लगाएका छन् । उनले भने, ‘हामीले मृत्युको कागजमा हस्ताक्षर गरेर यो अभियान थालेका छौँ । डराएर भाग्नेवाला छैनौं । सत्यको अभियान हाम्रो जीवन रहुन्जेल र त्यसपछि पनि जारी रहनेछ ।’

सार्वजनिक भिडियो फुटेजमा दीपक साहसहितको गाडीलाई घेरेर १०–१२ जना कार्यकर्ताले बोतलबाट कालो मोसो फ्याँकिरहेको देखिन्छ । ती कार्यकर्ताहरू ‘दीपक साह मुर्दावाद’ भन्दै चर्को नाराबाजी गरिरहेका देखिन्छन् ।

विकास सिंहले मोसो प्रहारलाई स्वीकृति दिँदै निष्कासित नेताहरूले पार्टीभित्र विघटनकारी गतिविधि गरेको, भ्रम फैलाएको र संगठन भित्र खलल पुर्याएको दाबी गरेका छन् ।