जनकपुरधाम, २९ असार । मधेश प्रदेशका उद्योग, वाणिज्य तथा पर्यटन मन्त्री बसन्त कुशवाहाले भारतबाट नेपाल घुम्न आउने पर्यटकप्रति सीमावर्ती नाकामा सहजीकरण गर्न सम्बन्धित जिल्लाका प्रशासन कार्यालयलाई निर्देशन दिएका छन् ।

पर्यटन प्रवर्द्धनका लागि आवश्यक कदम चाल्दै मन्त्री कुशवाहाले सप्तरी, सिरहा, धनुषा, महोत्तरी, सर्लाही, रौतहट, बारा र पर्सा जिल्लाका प्रमुख जिल्ला अधिकारीहरूलाई पत्र पठाएर भारतबाट आउने पर्यटकहरूलाई अनावश्यक झन्झट नदिन र उनीहरूप्रति मर्यादित र उचित व्यवहार गर्न आग्रह गरेका हुन् ।

पर्यटकहरूले सुरक्षाका नाममा अनावश्यक चेकजाँच, सोधपुछ र व्यवहारजन्य असहजताको सामना गर्नुपरेको गुनासो आएको भन्दै मन्त्री कुशवाहाले यस्तो अवस्थाले नेपाल भ्रमणमा आउने भारतीय नागरिकहरूमा नकारात्मक प्रभाव पार्ने चेतावनीसमेत दिएका छन् ।

मन्त्री कुशवाहाले सम्बद्ध निकायहरूलाई तत्काल यस्तो व्यवहार सुधार गर्न र पर्यटक मैत्री प्रणाली निर्माण गर्न अनुरोध गरेका छन् । पत्रमार्फत गृह मन्त्रालय सिंहदरबार, मुख्यमन्त्री तथा मन्त्रिपरिषद् कार्यालय मधेश प्रदेश र गृह, सञ्चार तथा कानून मन्त्रालय मधेश प्रदेशलाई समेत जानकारी गराइएको छ ।

सीमा क्षेत्रमा हुने व्यवहारले मधेश प्रदेशको पर्यटन क्षेत्रमा प्रत्यक्ष प्रभाव पार्ने भन्दै प्रदेश सरकारले भारतसँगको मित्रता र सांस्कृतिक सम्बन्धलाई प्रगाढ बनाउने दिशामा पहल थालेको छ ।