जनकपुरधाम, २६ असार । मधेश प्रदेश सभामा बजेटमाथि छलफल अवरुद्ध पार्ने अवस्था अझै टरेको छैन । विपक्षी दलहरूको अवरोध हटाउन सहमति जुटाउने प्रयासस्वरूप गठन गर्न लागिएको छानबिन कार्यदलमा मन्त्रीको नाम समावेश भएपछि सहमति बन्न सकेन ।

कार्यदलको संरचना विषयमा विवाद चुलिएपछि बिहीबारको बैठक १० मिनेट स्थगित भएको थियो । पछि असार २८ गतेसम्मका लागि बैठक पुनः स्थगित गरिएको छ ।

सभामुख रामचन्द्र मण्डलले बजेटमा देखिएको विवाद समाधान गर्न ६ सदस्यीय कार्यदलको प्रस्ताव गरे पनि कार्यदलमा भौतिक पूर्वाधार मन्त्री एवम् नेकपा एमाले संसदीय दलका नेता सरोजकुमार यादवको नाम राखिएपछि जनता समाजवादी पार्टी नेपाल (जसपा) ले आपत्ति जनाएको हो ।

जसपाका प्रमुख सचेतक रामअशिष यादवले भने, ‘जसको कार्यशैलीप्रति प्रश्न उठेको हो उसैलाई छानबिन समितिमा राख्नु न्यायसंगत हुँदैन ।’ उनले मन्त्रीलाई कार्यदलबाट हटाउन माग गरे ।

जसपाले मन्त्रीको सट्टामा सत्ता पक्षबाट अर्का कुनै सांसद राख्न सकिने सुझाव दिएको थियो । तर, सत्तारूढ दलले मन्त्रीको नाम नहटाउने अडान लिएपछि सहमति हुन नसकेको हो ।

मुख्यमन्त्री सतिश कुमार सिंहले बैठकअघि कार्यदल गठनबारे भएको सहमतिमा मन्त्री नराख्ने सर्त नभएको भन्दै प्रतिपक्षले सहमति भंग गर्न खोजेको टिप्पणी गरे ।

सभामुख मण्डलले कार्यदल संयोजकमा आफैँ रहने गरी सदस्यमा जसपाका रामअशिष यादव, माओवादी केन्द्रका जवाहरलाल कुशवाहा, नेकपा एसका कनिष पटेल, नेपाली कांग्रेसका कृष्णा यादव र एमालेका सरोजकुमार यादव रहेको जानकारी सदनमा दिएका थिए ।

चार दिनदेखि प्रदेशसभा बैठक अवरुद्ध भई बजेटमाथि छलफल सुरु हुन नसकेको अवस्था छ । अब सरकारले दुई दिनभित्र बजेट पारित गराउने दबाब झनै बढेको छ ।