जनकपुरधाम, २६ असार । मधेश प्रदेशका मुख्यमन्त्री सतिश कुमार सिंहले वातावरणीय असन्तुलन र मौसमको प्रतिकूलता सबैका लागि चिन्ताको विषय भएको बताएका छन् ।

राष्ट्रपति चुरे–तराई–मधेश संरक्षण विकास समिति कार्यक्रम कार्यान्वयन इकाई जनकपुरधामद्वारा आयोजित प्रदेशस्तरीय स्रोत परिचालन समिति तथा समन्वय समितिको संयुक्त बैठक बिहीबार धनुषाको लालगढ़मा उद्घाटन गर्दै मुख्यमन्त्री सिंहले वातावरणीय असन्तुलनका कारण खोलाको सतह बढ्दै जानु खतरापूर्ण संकेत भएको बताए ।

‘प्राकृतिक प्रकोपको जोखिम बढ्दो छ, त्यसैले चुरे संरक्षणका लागि संघ, प्रदेश र स्थानीय तहको साझा प्रयास अपरिहार्य छ,’ मुख्यमन्त्री सिंहले भने ।

उनले चुरे क्षेत्रको मरुभूमिकरण रोक्न र नदीजन्य संरचनाहरूको संरक्षणका लागि वातावरणमैत्री ढंगले उत्खनन गर्नुपर्नेमा जोड दिए । साथै, वातावरणमैत्री उत्खननबाट प्राप्त सामग्रीको निर्यातमार्फत प्रदेशको राजस्वमा वृद्धि गर्न सकिने सम्भावनातर्फ ध्यान दिनुपर्ने बताए ।

मुख्यमन्त्री सिंहले चुरे क्षेत्रलाई दीर्घकालीन रूपमा संरक्षण गर्न वैज्ञानिक ढंगले योजना बनाइनुपर्ने धारणा राखे ।

बैठकमा प्रदेश सरकारका उच्च अधिकारी, सरोकारवाला निकायका प्रतिनिधिहरू तथा संरक्षण अभियन्ताहरूको उपस्थिति थियो ।