जनकपुरधाम, २५ असार । मधेश प्रदेश सभामा आगामी आर्थिक वर्षको बजेटप्रति असहमति जनाउँदै विपक्षी दलहरूको अवरोध चौथो दिनसम्म पनि कायमै रह्यो ।

बिचौलियाको प्रभाव र बजेटमा असमानता रहेको आरोप लगाउँदै निरन्तर नाराबाजी गर्दै आएका विपक्षी सांसदहरूले बुधबार पनि बैठक सञ्चालन हुन दिएनन् ।

दिउँसो १ बजेका लागि बोलाइएको बैठक तोकिएको समयमै सुरु हुन नसकेपछि ३ बजेर १० मिनेटमा पुनः आह्वान गरिएको थियो । तर, करिब पौने ४ बजे सुरु भएको बैठक जम्मा चार मिनेटमै स्थगित गर्दै सभामुख रामचन्द्र मण्डलले बैठक बिहीबार दिउँसो १ बजेसम्मका लागि स्थगित भएको घोषणा गरे ।

विरोधमा उत्रिएका जनता समाजवादी पार्टी (जसपा) नेपाल, नेकपा माओवादी केन्द्र, नेकपा एकीकृत समाजवादी, नागरिक उन्मुक्ति पार्टी, संघीय समाजवादी पार्टी र राप्रपा नेपालले बजेटमा बिचौलियाको चलखेल र असमान वितरण भएको आरोप लगाउँदै सदन अवरुद्ध गर्दै आएका छन् ।

जसपाका प्रमुख सचेतक रामअशिष यादवले सत्तापक्षमै बजेटप्रति असन्तुष्टि देखिएको दाबी गर्दै भने, ‘सरकार आफैंभित्र असन्तुष्ट छ । सत्तापक्षका सांसदहरू नै अनुपस्थित छन् । हाम्रो माग सम्बोधन नभएसम्म सदन चल्न दिँदैनौं ।’

बैठक सञ्चालनको पहलस्वरूप बुधबार सर्वदलीय बैठक बोलाइए पनि निष्कर्षविहीन रह्यो । सभामुखले बजेट विषयमा छानबिनका लागि कार्यदल गठनको प्रस्ताव अघि सारे पनि सरकार पक्षले त्यसलाई अस्वीकार गरेको स्रोतको दाबी छ ।

असार १ गते बजेट प्रस्तुत भएयता असार ११ मा जम्मा २३ मिनेट मात्रै छलफल भएको थियो । त्यसयता चार पटक बैठक आह्वान गरिए पनि संसद् प्रभावकारी रूपमा सञ्चालन हुन सकेको छैन । बजेट पारित प्रक्रिया नै अन्योलमा परेको छ ।