काठमाडौं, २४ असार । संघीय लोकतान्त्रिक मोर्चाले आउँदो कार्तिक १७ गते हुने प्रतिनिधिसभा उपनिर्वाचनअन्तर्गत रुपन्देही क्षेत्र नम्बर–३ मा नागरिक उन्मुक्ति पार्टी (नाउपा)का उम्मेदवारलाई साझा उम्मेदवारको रूपमा समर्थन गर्ने निर्णय गरेको छ ।

मंगलबार काठमाडौंको शंखमुलमा तराई–मधेश लोकतान्त्रिक पार्टीका अध्यक्ष वृषेशचन्द्र लालको अध्यक्षतामा बसेको मोर्चाको बैठकले नौ बुँदे प्रस्ताव पारित गर्दै विभिन्न समसामयिक राजनीतिक र सामाजिक विषयमा ध्यानाकर्षण गराएको हो ।

बैठकले निजामती सेवा ऐनमा राज्य व्यवस्था तथा सुशासन समितिमा भएको चलखेललाई लोकतान्त्रिक प्रक्रिया र संसदको अपमान भनेको छ । दोषीहरूमाथि कडा कारबाहीको माग गर्दै संवैधानिक नियुक्तिबारे सर्वोच्च अदालतको हालैको फैसलालाई संविधानको मर्मविपरीत ठहर गर्दै छुट्टै संवैधानिक अदालत गठनको माग गरिएको छ ।

रसुवामा आएको बाढी र पहिरोमा ज्यान गुमाउनेप्रति श्रद्धाञ्जलि अर्पण गर्दै घाइतेहरूको शीघ्र स्वास्थ्य लाभको कामना गरिएको छ । वेपत्ता व्यक्तिहरूको खोजी तथा घरवारविहीन पीडितहरूलाई राहत र पुनर्वासको व्यवस्था गर्न पनि सरकारसँग माग गरिएको छ ।

मोर्चाले तराई–मधेशमा सिँचाइको अभाव र मलखादको चरम संकटका कारण कृषकहरू पीडामा परेको भन्दै सहज आपूर्तिको माग अघि सारेको छ ।

प्रधानमन्त्रीले सभ्यता, संस्कृति र सनातन धर्मसम्बन्धी दिएका अपुष्ट अभिव्यक्तिप्रति आपत्ति जनाउँदै मोर्चाले ती अभिव्यक्ति फिर्ता लिन आग्रह गरेको छ ।

मोर्चाले आफ्ना उद्देश्य र औचित्य स्पष्ट पार्ने उद्देश्यले साउन र भदौ महिनामा काठमाडौं, भैरहवा, नेपालगञ्ज, कैलाली, विराटनगर, राजविराज, जनकपुर र वीरगञ्जमा जनजागरण कार्यक्रम सञ्चालन गर्ने निर्णय पनि गरेको छ ।

संविधान संशोधनबारे साझा धारणा निर्माण गर्दै अघि बढ्ने मोर्चाको अडान रहेको छ । वर्तमान सत्ता गठबन्धनले संविधान संशोधनको वाचा गरेकाले यसको धारणा तत्काल सार्वजनिक गर्न माग गरिएको छ ।

त्यस्तै, विभिन्न आन्दोलनका क्रममा झुठा मुद्दामा जेलमा राखिएका राजबन्दीहरूको रिहाइ र लाल आयोगको प्रतिवेदन सार्वजनिक गर्न समेत मोर्चाले सरकारसँग आग्रह गरेको छ ।