जनकपुरधाम, ११ असार । मधेश प्रदेशका गृह, सञ्चार तथा कानूनमन्त्री राजकुमार लेखीले पछिल्लो समय नेपाली पत्रकारिता विशेषतः अनलाइन मिडियामा लोकप्रियता बढे पनि पत्रकार आचारसंहिताको पालना कमजोर भएको बताएका छन् ।

आमसञ्चार प्राधिकरण मधेश प्रदेशको आयोजनामा धनुषाको मिथिला विहारी नगरपालिका–२ पुरन्दाहामा सुरु भएको तीनदिने अनलाइन सञ्चारमाध्यम सम्पादक अभिमुखीकरण कार्यक्रमको उद्घाटन गर्दै मन्त्री लेखीले यस्तो टिप्पणी गरेका हुन् ।

उक्त अवसरमा मन्त्री लेखीले मेहनती पत्रकारिता पछिल्ला दिनमा हराउँदै गएको भन्दै कपी–पेस्ट प्रवृत्ति हावी भएकोप्रति चिन्ता व्यक्त गरे । उनले भने, ‘गुणस्तरीय र विश्वसनीय पत्रकारिता लोकतन्त्र, गणतन्त्र र नागरिक स्वतन्त्रताको मेरुदण्ड हो । यसको कमजोरी देशकै कमजोरी हो ।’

उनले पत्रकारिता क्षेत्रलाई राज्यको रुपान्तरण, समावेशिता, दलित तथा थारू समुदायको सहभागिता र सामाजिक न्याय स्थापनाको औजारका रूपमा चित्रण गर्दै कलम सधैं सचेत र उत्तरदायी रहनुपर्ने धारणा राखे ।

कार्यक्रममा बोल्दै उनले मधेश प्रदेश सरकारले संविधानको मर्मअनुसार विभिन्न निकायमा दलित र थारू समुदायका प्रतिनिधिहरूलाई नियुक्त गरेको र यसले समाजमा सकारात्मक तरंग ल्याएको दाबी गरे ।

‘म कुनै शक्तिको डरले झुक्ने मान्छे होइन,’ मन्त्री लेखीले भने, ‘संविधान, प्रचलित ऐन र नियमावलीको पालना गर्दै म जिम्मेवारी पूरा गर्छु ।’

१३ गतेसम्म चल्ने अभिमुखीकरण कार्यक्रममा मधेश प्रदेशमा दर्ता भएका अनलाइन मिडियाका सम्पादकहरू सहभागी रहेको प्राधिकरणका निमित्त प्रमुख प्रसन्नराज कर्णले दिए ।

कार्यक्रममा आमसञ्चार प्राधिकरणका अध्यक्ष जितेन्द्र खड्का, मुख्यमन्त्रीका प्रेस सल्लाहकार अवधेश कुमार झा, चलचित्र तथा लोक सञ्चार प्रवद्र्धन बोर्डका अध्यक्ष किशोर कुमार लेखी, मिडिया काउन्सिलका कार्यवाहक अध्यक्ष सुरेश यादव, आमसञ्चार प्राधिकरणका सदस्य ज्योति झा, मिडिया काउन्सिलका सदस्य मन्नु कुमार पासमान लगायतका व्यक्तिहरू उपस्थित थिए ।