जनकपुरधाम, ८ असार । मधेश प्रदेश मिडिया काउन्सिलका अध्यक्ष कमलकुमार उपाध्यायलाई विशेष अदालतले भ्रष्टाचार मुद्दामा दोषी ठहर गर्दै ६ महिना कैद र १ लाख १७ हजार ५२० रुपैयाँ जरिवाना गर्ने फैसला सुनाएको छ ।

विशेष अदालतका अध्यक्ष टेकनारायण कुँवर र न्यायाधीशहरू रामबहादुर थापा तथा रितेन्द्र थापाको संयुक्त इजलासले उपाध्यायविरुद्धको मुद्दामा आइतबार फैसला सुनाएको हो ।

उपाध्यायमाथि २०८२ साल वैशाख ९ गते अख्तियार दुरुपयोग अनुसन्धान आयोगले भ्रष्टाचारको मुद्दा दायर गरेको थियो । उपाध्यायमाथि काउन्सिलको अध्यक्ष नियुक्त भएको दोस्रो दिनमै मुद्दा दायर भएको थियो ।

अख्तियारका अनुसार उपाध्यायले पचरौता नगरपालिकाको दुई ठेक्काको टेण्डर सूचना राष्ट्रियस्तरको पत्रिकामा प्रकाशन गर्नुपर्नेमा केवल एकप्रति रेकर्डका लागि मात्र छापेर विज्ञापन खर्चको रूपमा ३ लाख ५२ हजार ५६० रुपैयाँको बिल पेश गरेका थिए । उक्त कार्य उनकै स्वामित्वमा रहेको केएस मल्टीपरपोज प्रालिमार्फत गरिएको प्रमाणित भएको थियो ।

विशेष अदालतले सोही कम्पनीलाई पनि १ लाख १७ हजार ५२० रुपैयाँ जरिवाना तिराउने फैसला सुनाएको छ ।

सार्वजनिक खरिद ऐनको उल्लंघन गर्दै नगरपालिका प्रशासनसँगको मिलेमतोमा भ्रष्टाचार गरिएको ठहर गरिएको छ । सोही मुद्दामा संलग्न रहेका पचरौता नगरपालिकाका निमित्त प्रमुख प्रशासकीय अधिकृत श्यामप्रसाद यादवलाई समेत समान सजाय सुनाइएको छ ।

यद्यपि, सो प्रकरणमा संलग्न देखिएका नगरपालिकाका लेखापाल हासिम मिया अन्सारीलाई भने ‘उच्च पदस्थको आदेशमा भुक्तानी मात्र गरेको’ प्रमाणित भएकाले अदालतले सफाइ दिएको छ ।

कमलकुमार उपाध्याय नेपाल पत्रकार महासंघ बाराका पूर्वअध्यक्ष, प्रेस चौतारी नेपालका पूर्वसचिव तथा ‘कृपा दैनिक’ का प्रकाशक तथा सम्पादक समेत हुन् ।