जनकपुरधाम, ७ असार । मैथिली भाषा, साहित्यको प्रवद्र्धन गर्ने उद्देश्यसहित मैथिली विकास कोषको आयोजनामा प्रत्येक महिनाको पहिलो शनिबार आयोजना हुँदै आएको कथा गोष्ठी शनिबार जनकपुरधाममा सम्पन्न भएको छ ।

यस पटकको गोष्ठीमा भारतका प्रख्यात चित्रकार सन्तोष कुमार दास, साहित्यकार एवम् अभियानी सविता झा तथा वरिष्ठ साहित्यकार रोशन जनकपुरीको विशेष उपस्थिति रहेको थियो । कार्यक्रममा मैथिली भाषा, कला र समकालीन साहित्यमा युवाको सहभागिता, चुनौती र सम्भावनाको विषयमा छलफलसमेत गरियो ।

‘मैथिली चित्रकला र भाषा एउटै मुहानका धार हुन् । शब्दले जे व्यक्त गर्छ, चित्र त्यसको दृष्टिगोचर रूप हो,’ दासले भने, ‘हामीले परम्परालाई संरक्षण गर्दै नयाँ पुस्तामा हस्तान्तरण गर्न सके मात्र मैथिलीको भविष्य उज्यालो हुनेछ ।’

मैथिली भाषा र नारी चेतना विषयमा काम गर्दै आएकी अभियानी सविता झाले भनिन्, ‘आजको कथाहरूमा मिथिला नारीको आवाज देखिन्छ । तर, त्यो अझ सशक्त हुन आवश्यक छ । मैथिली साहित्यमा महिलाको लेखनलाई केन्द्रमा ल्याउने बेला आएको छ ।’

वरिष्ठ साहित्यकार रोशन जनकपुरीले भने, ‘गोष्ठीहरू सिर्जनात्मक उर्जा आदान–प्रदान गर्ने थलो हुन् । यस्ता कार्यक्रममा निरन्तरता दिनु नै भाषाको संरक्षण हो ।’

कार्यक्रममा वरिष्ठ पत्रकार सुजित कुमार झा, मैथिली विकास कोषका अध्यक्ष जीवनाथ चौधरी, कवियत्री पूनम झा मैथिली लगायत स्थानीय साहित्य अनुरागीहरूको उपस्थिति रहेको थियो । कथावाचन, समिक्षा र संवादमा सहभागीहरूले मैथिली साहित्यको गम्भीर अभ्यास र युवा पुस्तालाई आकर्षित गर्नेबारे आ–आफ्नो धारणा राखेका थिए ।

मैथिली विकास कोषका अध्यक्ष जीवनाथ चौधरीका अनुसार यस्तो कथा गोष्ठी हरेक महिनाको पहिलो शनिबार नियमित रूपमा आयोजना हुँदै आएको छ । आगामी दिनमा कथासँगै कविता, नाटक तथा लघु चलचित्रमाथि समेत छलफल गरिने तयारी भइरहेको उनले बताए ।