जनकपुरधाम, २३ जेठ । मधेश प्रदेशमा वातावरणीय सुधार, हरियाली प्रवद्र्धन तथा शैक्षिक संस्थाको सौन्दर्य अभिवृद्धि गर्न विद्यार्थी जनमत संघले वन तथा वातावरण मन्त्रालय समक्ष विद्यालय र क्याम्पसहरूमा ‘हरित पार्क’ निर्माणका लागि बजेट विनियोजन गर्न आग्रह गरेको छ ।

वन तथा वातावरणमन्त्री संजय कुमार यादवलाई बुझाइएको ज्ञापनपत्रमा संघले ‘स्वच्छ वातावरण र मैत्रीपूर्ण पार्क निर्माण’ को माध्यमबाट हरित प्रदेश निर्माण गर्ने प्रदेश सरकारको अभियानलाई सफल बनाउन विद्यार्थी समुदायको पनि भूमिका महत्वपूर्ण हुने उल्लेख गरेको छ ।

संघका केन्द्रीय संयोजक पोषण कुमार यादवद्वारा हस्ताक्षरित ज्ञापनपत्रमा भनिएको छ, ‘हरित प्रदेशको सपना साकार पार्न शैक्षिक संस्थाहरूमै वातावरणमैत्री संरचना र पार्क निर्माण गरेर जागरुक पुस्ता निर्माण गर्नु अत्यावश्यक छ । यसका लागि तत्कालीन योजनाका साथ बजेट विनियोजन आवश्यक छ ।’

ज्ञापनपत्रमा प्रदेशभरका सबै क्याम्पसमा हरित पार्क निर्माण गर्न, माध्यमिक विद्यालयहरूमा हरित पार्क निर्माण गर्न, विद्यालय तथा क्याम्पसहरूमा स्वच्छ, सफा र दिगो शौचालयको निर्माण गर्न र जीर्ण भइसकेका क्याम्पसहरूको पूर्वाधारको स्तरउन्नति गर्न प्रस्ताव राखिएको छ ।

संघले विद्यालय तथा क्याम्पस क्षेत्रलाई हरियालीयुक्त, स्वच्छ र आकर्षक बनाएमा विद्यार्थीहरूको मनोविज्ञानमा सकारात्मक प्रभाव पर्ने, शैक्षिक वातावरण सुधार हुने र स्वास्थ्यमा समेत प्रत्यक्ष असर पर्ने उल्लेख गरेको छ । साथै, यस्तो पहलले वातावरणीय सचेतना वृद्धि गर्दै भविष्यको नागरिकमा प्रकृतिप्रतिको उत्तरदायित्वबोध बढाउने विश्वास संघले व्यक्त गरेको छ ।

विद्यार्थी जनमत संघले यस अभियानमा सरकारको नेतृत्वमा विद्यार्थी समुदाय समेत सहभागी हुने प्रतिबद्धता जनाउँदै सरकारी तहबाट आवश्यक पहल र नीति तथा कार्यक्रममार्फत हरित संरचना निर्माणमा प्राथमिकता दिनुपर्ने माग राखेको छ ।

उक्त प्रस्तावलाई सकारात्मक रूपमा लिँदै वनमन्त्री यादवले मन्त्रालयको दीर्घकालीन योजनामा यस्ता कार्यक्रम समावेश गरिने संकेत गरेका छन् । ‘हरित प्रदेश निर्माण सरकारको प्रमुख अभियान हो,’ उनले भने, ‘विद्यार्थीहरूको यस्तो पहल स्वागतयोग्य छ । यसलाई बजेटीय रूपमा समेट्ने प्रयास हुनेछ ।’