जनकपुरधाम, २४ साउन । जनकपुरधाम उपमहानगरपालिका–७ जनकीनगरस्थित श्री रामजानकी माध्यमिक विद्यालयमा निर्माण सम्पन्न भएका चार कोठे र दुई कोठे गरी ६ कोठाका नयाँ भवन उद्घाटन गरिएको छ ।

नवनिर्मित भवन सञ्चालनमा आएसँगै विद्यालयमा देखिँदै आएको कक्षाकोठाको अभाव केही हदसम्म समाधान हुने विश्वास गरिएको छ ।

विद्यालयले आयोजना गरेको कार्यक्रममा जनकपुरधाम उपमहानगरपालिकाका नगरप्रमुख मनोजकुमार साहले नवनिर्मित भवनको उद्घाटन गरेका हुन् ।कार्यक्रमको अध्यक्षता विद्यालय व्यवस्थापन समितिका अध्यक्षसमेत रहेका वडाध्यक्ष नीरजकुमार साहले गरेका थिए ।

नयाँ भवन निर्माण सम्पन्न भएसँगै विद्यालयमा विद्यार्थीलाई कक्षाकोठा व्यवस्थापन गर्न सहज हुने विद्यालय प्रशासनले जनाएको छ । पर्याप्त कक्षाकोठा नहुँदा पठनपाठन सञ्चालनमा देखिने समस्या कम हुनुका साथै विद्यार्थीलाई व्यवस्थित वातावरणमा अध्ययन गर्ने अवसर प्राप्त हुने विश्वास गरिएको छ ।

विद्यालयका अनुसार पछिल्लो समय विद्यार्थीको संख्या र शैक्षिक गतिविधि बढ्दै गएसँगै भौतिक पूर्वाधारको आवश्यकता पनि बढिरहेको थियो । नयाँ भवन थपिएपछि कक्षा सञ्चालनका लागि आवश्यक स्थान व्यवस्थापन गर्न सहज हुने विद्यालयको भनाइ छ ।

भवन उद्घाटन कार्यक्रममा नगरप्रमुख साहले विद्यालयको भौतिक पूर्वाधार विकाससँगै शैक्षिक गुणस्तर सुधारलाई पनि समान प्राथमिकता दिनुपर्नेमा जोड दिए ।

उनले विद्यालयमा नयाँ भवन निर्माण हुनु सकारात्मक उपलब्धि भएको उल्लेख गर्दै निर्माण भएका भौतिक संरचनाको संरक्षण र प्रभावकारी प्रयोगमा विद्यालय प्रशासन, शिक्षक, विद्यार्थी र अभिभावक सबैको भूमिका महत्वपूर्ण हुने बताए ।

नगरप्रमुख साहले विद्यालयको भौतिक अवस्था सुधार हुँदै जाँदा त्यसको प्रत्यक्ष प्रभाव विद्यार्थीको सिकाइ उपलब्धिमा देखिनुपर्ने धारणा राखे ।

‘विद्यालयका लागि भवन निर्माण हुनु आफैँमा महत्वपूर्ण उपलब्धि हो । तर, भवन निर्माणपछि विद्यार्थीले त्यसबाट कस्तो शैक्षिक लाभ पाए भन्ने कुरा अझ महत्वपूर्ण हुन्छ,’ उनले भने, ‘पूर्वाधारसँगै शिक्षाको गुणस्तर, अनुशासन र सिकाइ उपलब्धि सुधारमा पनि ध्यान दिनुपर्छ ।’

उनले स्थानीय तहले विद्यालयको शैक्षिक तथा भौतिक विकासका लागि आवश्यक सहयोग र समन्वयलाई निरन्तरता दिने प्रतिबद्धतासमेत व्यक्त गरे ।

कार्यक्रममा वडाध्यक्ष साहले विद्यालयलाई स्थानीय समुदायको महत्वपूर्ण शैक्षिक केन्द्रका रूपमा विकास गर्न आवश्यक सहयोग गर्ने प्रतिबद्धता व्यक्त गरे ।

वडाध्यक्ष साहले विद्यालयको पूर्वाधार विकासले यस क्षेत्रका विद्यार्थीलाई प्रत्यक्ष लाभ पुग्ने बताउँदै विद्यालयका आवश्यकता र समस्यालाई क्रमशः सम्बोधन गर्न वडा तहबाट सक्दो सहयोग गर्ने बताए ।

उनका अनुसार विद्यालयमा आवश्यक पूर्वाधार निर्माणसँगै शैक्षिक वातावरण सुधारका लागि स्थानीय समुदाय, विद्यालय प्रशासन र जनप्रतिनिधिबीच सहकार्य आवश्यक छ ।

‘यो विद्यालय यस क्षेत्रका बालबालिकाको शिक्षाको महत्वपूर्ण आधार हो । विद्यालयको पूर्वाधार राम्रो भए त्यसको प्रत्यक्ष लाभ स्थानीय विद्यार्थीले पाउँछन्,’ वडाध्यक्ष साहले भने, ‘विद्यालयको आवश्यकता पहिचान गरेर वडा तहबाट आवश्यक सहयोग र समन्वयलाई निरन्तरता दिनेछौँ ।’

नवनिर्मित ६ कोठे भवन सञ्चालनमा आएपछि विद्यालयमा कक्षाकोठा व्यवस्थापन थप सहज हुने विश्वास गरिएको छ । नयाँ संरचनाले विद्यार्थीलाई अध्ययनका लागि आवश्यक भौतिक वातावरण उपलब्ध गराउनुका साथै शिक्षकलाई पनि नियमित पठनपाठन सञ्चालनमा सहयोग पुग्ने विद्यालयको विश्वास छ ।

विद्यालयमा पर्याप्त कक्षाकोठा नहुँदा एउटै संरचनामा विभिन्न कक्षा व्यवस्थापन गर्नुपर्ने अवस्था आउने गरेको थियो । नयाँ भवन थपिएपछि कक्षा सञ्चालनमा सहजता आउने र विद्यार्थीलाई शान्त तथा व्यवस्थित वातावरणमा पढ्ने अवसर मिल्ने विद्यालय प्रशासनले जनाएको छ ।

विद्यालयले भौतिक संरचनाको विकाससँगै शिक्षण सिकाइको गुणस्तर सुधारमा समेत ध्यान दिइरहेको जनाएको छ । विद्यार्थीको सिकाइ उपलब्धि बढाउन शिक्षकको क्षमता विकास, नियमित कक्षा सञ्चालन, अभिभावकको सहभागिता तथा विद्यालय–समुदायबीचको सहकार्यलाई समेत प्रभावकारी बनाउनुपर्ने विद्यालयको भनाइ छ ।

विद्यालय व्यवस्थापन समितिले नयाँ भवनको संरक्षण, सरसफाइ तथा प्रभावकारी प्रयोगमा विशेष ध्यान दिने जनाएको छ । विद्यालयका लागि निर्माण भएका संरचना लामो समयसम्म उपयोगी बनाउन विद्यार्थी, शिक्षक, कर्मचारी तथा अभिभावकको सामूहिक जिम्मेवारी आवश्यक रहेको विद्यालयको भनाइ छ ।

भवन उद्घाटन कार्यक्रममा जनकपुरधाम उपमहानगरपालिकाको शिक्षा शाखा प्रमुख अञ्जु पाण्डे, विद्यालयका प्रधानाध्यापक कालीचरण चौधरी, विद्यालय व्यवस्थापन समितिका पदाधिकारी, शिक्षक तथा कर्मचारी, अभिभावक, विद्यार्थी र स्थानीयवासीको सहभागिता रहेको थियो ।

कार्यक्रममा सहभागी वक्ताहरूले विद्यालयको भौतिक पूर्वाधार विकासलाई शिक्षाको गुणस्तर सुधारसँग जोडेर अघि बढाउनुपर्नेमा जोड दिएका थिए ।