सर्लाही, ३ मंसिर । पूर्व–पश्चिम राजमार्गअन्तर्गत सर्लाहीको बागमती नगरपालिका–११ रायमाझी चोक नजिक कारको ठक्करबाट एक पैदलयात्रीको मृत्यु भएको छ ।

मङ्गलबार राति बालाचतुर्दशी मेला हेरेर घर फर्किरहेका ५० वर्षीय केशव शिवाकोटीको उपचारका क्रममा मृत्यु भएको हो ।

बागमती नगरपालिका–४ प्रसाई टोलका शिवाकोटीलाई नम्बर नखुलेको कारले अचानक ठक्कर दिएर गम्भीर घाइते बनाएको इलाका प्रहरी कार्यालय कर्मैयाले जनाएको छ । दुर्घटनापछि उनलाई वीरगंजको न्यूरो अस्पताल लैजाँदै गर्दा मृत्यु भएको हो ।

ठक्कर दिएर फरार भएको कारले केही दूरीमा गएर बागमती प्रदेश ०३–००१ ख ३४५५ नम्बरको यात्रुवाहक बससँग पनि ठोक्किएको प्रहरीले जनाएको छ । दुवै घटनापछि चालक गाडी सहित फरार भएको बताइएको छ ।

इलाका प्रहरी कार्यालय हरिवनका वरिष्ठ प्रहरी नायब निरीक्षक दीपेन्द्र मल्लका अनुसार दुर्घटना गराएर भागेको कारको पहिचान भइसकेको छ । प्रहरीले घटनाको विस्तृत अनुसन्धान अघि बढाएको छ ।