सप्तरी, ३० असोज । सप्तरीको विष्णुपुर गाउँपालिका–१ जमुनीस्थित हुलाकी सडक खण्डमा भएको मोटरसाइकल दुर्घटनामा गम्भीर घाइते भएकी एक महिलाको उपचारका क्रममा मृत्यु भएको छ ।

सुरुङ्गा नगरपालिका–१० सिस्वाकी ४० वर्षीया विमला देवी यादवको बिहीबार गजेन्द्रनारायण सिंह अस्पताल राजविराजमा उपचारकै क्रममा मृत्यु भएको जिल्ला प्रहरी कार्यालय सप्तरीका प्रहरी नायब उपरीक्षक डम्बरबहादुर पुरीले जानकारी दिए ।

घटना बुधबार साँझ करिब ५ बजे भएको थियो । ३५ वर्षीय प्रमोद यादवले चलाइराखेको स.९ प.९०३९ नम्बरको मोटरसाइकलमा सवार विमला देवी सिस्वाबाट राजविराजतर्फ जाँदै गर्दा हुलाकी सडक खण्डमा अचानक मोटरसाइकल अनियन्त्रित भई दुर्घटना भएको प्रहरीले बताएको छ ।

दुर्घटनामा दुवै जना घाइते भएका थिए । गम्भीर घाइते विमला देवीलाई सुरुमा राजविराजस्थित गजेन्द्रनारायण सिंह अस्पतालमा उपचार गरिएको थियो । अवस्था जटिल भएपछि उनलाई थप उपचारका लागि विराटनगर पठाइएको थियो । तर, उपचार खर्चको अभावमा परिवारजनले उनलाई पुनः राजविराज फर्काउँदा चिकित्सकले मृत घोषणा गरेका थिए ।

घाइते मोटरसाइकल चालक प्रमोद यादवको अहिले पनि उपचार भइरहेको प्रहरीले जनाएको छ । दुर्घटनामा संलग्न मोटरसाइकल प्रहरी नियन्त्रणमा लिइएको छ ।