सुनसरी, २५ असोज । सुनसरीको रामधुनी नगरपालिका–२ कर्मनिया टोलमा शनिबार साँझ सिटी सफारी चालकको रहस्यमय ढंगले हत्या भएको छ । रगताम्य अवस्थामा सडकछेउमा शव फेला परेपछि स्थानीयवासी त्रसित बनेका छन् ।

प्रहरीका अनुसार रामधुनी–२ का ४५ वर्षीय दिनेशकुमार चौधरीको शव प्र–१–०२–००४ ह ७८०४ नम्बरको सिटी सफारीदेखि करिब २०० मिटर टाढा रगतले लतपत अवस्थामा फेला परेको हो । चौधरी उत्तरबाट दक्षिणतर्फ सवारी लिएर जाँदै गर्दा बीच बाटोमै अज्ञात व्यक्तिले हमला गरेको प्रारम्भिक अनुमान गरिएको छ ।

घटनाको सूचना प्राप्त हुनासाथ इलाका प्रहरी कार्यालय रामधुनीका प्रमुख प्रहरी निरीक्षक सुजन मुदेलको कमाण्डमा प्रहरी टोली घटनास्थल पुगेको थियो । टोलीले घटनास्थल पुग्दा चौधरीको मृत्यु भइसकेको पुष्टि गरेपछि थप अनुसन्धानका लागि जिल्ला प्रहरी कार्यालय सुनसरीका प्रमुख प्रहरी उपरीक्षक केशवकुमार थेबे नेतृत्वमा टोली खटिएको हो ।

प्रारम्भिक अनुसन्धानमा मृतकको बायाँ छातीमा गहिरो चोट रहेको र शरीरभरि रगत बगेको देखिएको प्रहरीले जनाएको छ । छातीमा लागेको चोट र घटनास्थलको स्वरूपले गोली प्रहार गरी हत्या गरिएको हुनसक्ने आशंका गरिएको डीएसपी योगराज खतिवडाले बताए ।

‘घटनास्थलमा देखिएको रगतको मात्रा, छातीमा देखिएको घाउ र स्थानीयले सुनेको आवाजका आधारमा गोली चलाइएको हुनसक्छ,’ डीएसपी खतिवडाले भने, ‘तर, पोस्टमार्टम रिपोर्टपछि मात्र पुष्टि हुनेछ ।’

प्रहरीले कानुनी प्रक्रिया पूरा गरी चौधरीको शवलाई बीपी कोइराला स्वास्थ्य विज्ञान प्रतिष्ठान धरानमा पोस्टमार्टमका लागि पठाएको छ । घटनापछि स्थानीयवासी त्रासमा परेका छन् । धेरैले राति अबेरसम्म प्रहरीलाई सुरक्षा गस्ती बढाउन माग गरेका छन् ।

घटनाको कारण र अभियुक्तको पहिचान अहिलेसम्म खुल्न सकेको छैन । प्रहरीले घटनास्थल वरिपरि क्षेत्र सिल गरेर व्यापक अनुसन्धान थालेको छ । सीसीटीभी फुटेज, मोबाइल कल डिटेल र चौधरीको पछिल्ला गतिविधिको आधारमा अनुसन्धान अघि बढाइरहेको प्रहरी स्रोतले जनाएको छ ।

स्थानीयवासीहरूका अनुसार चौधरी विगत लामो समयदेखि सिटी सफारी चलाउँदै आएका सामान्य स्वभावका व्यक्ति थिए । उनी घरबाट दिउँसो सफारी लिएर निस्किएका थिए र साँझसम्म घर नफर्केपछि परिवारले खोजी थालेका थिए ।

हत्या किन र कसले गर्यो भन्ने यकिन हुन बाँकी रहे पनि प्रहरीले यो घटनालाई पूर्वनियोजित आपराधिक गतिविधिको रूपमा हेरेर अनुसन्धान अघि बढाएको जनाएको छ ।