जनकपुरधाम, ३० असार । महोत्तरीको जलेश्वर नगरपालिका–६ मा आइतबार साँझ कारले स्कुटीलाई ठक्कर दिँदा एक जना गम्भीर घाइते भएका छन् ।

जिल्ला प्रहरी कार्यालय महोत्तरीका अनुसार जलेश्वरबाट भिट्टामोडतर्फ गइरहेको प्रदेश २–००–००२ प ८८५० नम्बरको स्कुटीलाई सोही दिशातर्फ जाँदै गरेको बा १५ च ५२३३ नम्बरको कारले ठक्कर दिएको हो । दुर्घटनामा स्कुटी चालक जलेश्वर–६ निवासी श्यामकुमार शर्मा गम्भीर घाइते भएका छन् ।

घाइते शर्मालाई उपचारका लागि ललितपुरस्थित बीएण्डबी अस्पतालमा पठाइएको प्रहरीले जनाएको छ ।

कार चालकको परिचय खुलेसँगै घटनाले थप चासो पाएको छ । ठक्कर दिने कार चलाइरहेका व्यक्ति सुमित शर्मा, मधेश प्रदेश सरकारकी शिक्षा तथा संस्कृति मन्त्री रानी कुमारी तिवारीका छोरा हुन् । उनी पनि दुर्घटनामा सामान्य घाइते भएका छन् । उनको हाल जनकपुरमा उपचार भइरहेको छ ।

मन्त्री तिवारीले दुर्घटनाबारे प्रतिक्रिया दिँदै छोरा र बुहारी एकसाथ कारमा रहेको अवस्थामा अचानक छोरा बेहोस भएपछि कार अनियन्त्रित भई स्कुटी ठोकिएको जानकारी दिएकी छन् ।

जिल्ला प्रहरी कार्यालय महोत्तरीका प्रवक्ता डीएसपी शैलेन्द्र कुमार खड्काले दुर्घटनाबारे आवश्यक अनुसन्धान भइरहेको बताएका छन् ।