सुनसरी, २८ असार । देशभर युनिसेक्स पार्लर सेवा दिँदै आएको फेसियल हाउसले आफ्नो १०औं शाखा इटहरीको सेन्ट्रल प्लाजामा विस्तार गरेको छ । सौन्दर्य सेवा प्रदान गर्दै आएको यस संस्थाले पूर्वी नेपालमा सेवा पुर्याउने लक्ष्यसहित इटहरी शाखा स्थापना गरेको हो ।

शाखाको शुक्रबार एक विशेष समारोहकाबीच इटहरी उपमहानगरपालिकाकी उपप्रमुख संगिता कुमारी चौधरीले उद्घाटन गरिन् । कार्यक्रममा उद्योग वाणिज्य संघ इटहरीका अध्यक्ष जीवन पराजुली, व्यवसायी गायत्री भण्डारी लगायतको उपस्थिति थियो ।

फेसियल हाउसकी प्रबन्ध निर्देशक तथा उद्योग वाणिज्य संघ काठमाडौंकी सचिव सुस्मा महराका अनुसार नयाँ शाखाबाट बालबालिका, महिला र पुरुष सबै उमेर समूहका व्यक्तिहरूका लागि युनिसेक्स पार्लर सेवा प्रदान गरिनेछ ।

‘हामी हेयर ट्रीटमेन्ट, हेयर कलर, स्ट्रेट, कर्ली, मेडीकेयर, जेल नेल, माइक्रोब्लेडिङ, पिम्पल तथा चायापोता उपचार लगायतका सेवा प्रदान गरिरहेका छौं,‘ महराले भनिन् । उनका अनुसार सामूहिक रूपमा विभिन्न शाखाहरूको लागि कस्मेटिक सामग्री खरिद गर्दा लागत घट्ने भएकाले ग्राहकलाई सुपथ मूल्यमा सेवा दिन सकिनेछ ।

कोभिड–१९ महामारीका कारण केही वर्षअघि झापामा स्थापना गरिएको शाखा बन्द गर्नु परे पनि पछिल्लो समय कम्पनीले पश्चिम र मध्य–पश्चिम क्षेत्रमा सेवा विस्तार गर्दै आएको थियो । अब भने पूर्वी नेपालमा पुनः सेवा विस्तार गरिएको छ ।
महराका अनुसार राजधानी केन्द्रित सोचलाई तोड्दै सेवा गाउँगाउँसम्म पुर्याउने लक्ष्यका साथ व्यवसायको दीर्घकालीन सुदृढीकरणमा ध्यान केन्द्रित गरिएको हो ।

उद्घाटन समारोहमा बोल्दै उपप्रमुख चौधरीले निजी क्षेत्रको योगदान बिना समग्र आर्थिक विकास सम्भव नहुने उल्लेख गर्दै स्थानीय सरकारले व्यवसाय प्रवद्र्धनमा सघाउने प्रतिवद्धता व्यक्त गरिन् ।

इटहरी शाखाबाट पनि ग्राहकले गुणस्तरीय सेवा सहुलियत दरमा पाउने कम्पनीको विश्वास छ ।