सुनसरी, २ वैशाख । नेपाल–भारत सीमावर्ती क्षेत्र सुनसरीको देवानगञ्जमा सोमबार साँझ भएको गोलीकाण्डको घटना झनै रहस्यमयी बन्दै गएको छ । गोली प्रहारमा संलग्न रहेको आरोपमा प्रहरीले दुई जनालाई नियन्त्रणमा लिएको छ भने घटनामा संलग्न ५–६ जनाको समूहको पहिचान भइसकेको कोशी प्रदेश प्रहरी प्रमुख डीआईजी राजन अधिकारीले जानकारी दिएका छन् ।

पक्राउ परेका व्यक्तिहरूमा देवानगञ्ज–१ का २७ वर्षीय रवीनकुमार यादव र २१ वर्षीय पिन्टु यादव रहेका छन् । उनीहरूमाथि हाल अनुसन्धान अघि बढाइएको प्रहरी स्रोतले जनाएको छ । यसबीच घटनामा प्रयोग गरिएको मोटरसाइकल र गाडी पनि प्रहरीले नियन्त्रणमा लिएको छ ।

प्रहरी अनुसार सोमबार साँझ देवानगञ्ज गाउँपालिका–७ का २१ वर्षीय शिवकुमार मेहता र पिन्टु मेहतामाथि बजारको सडकखण्डमा अज्ञात समूहले गोली प्रहार गरेका थिए । शिवकुमारलाई ढाडदेखि कम्मरसम्म गोली लागेको छ भने अर्का घाइते पिन्टुको अवस्था पनि गम्भीर छ । एक अन्य व्यक्ति भने गोलीको डरले भाग्ने क्रममा लडेका कारण सामान्य घाइते भएका छन् ।

घटनाबारे बोल्दै स्थानीय नेतासमेत रहेका समाजसेवी रमेश शर्मा भन्छन्, ‘यो घटना सामान्य आपराधिक गतिविधि होइन, सीमावर्ती क्षेत्रलाई केन्द्रमा राखेर संगठित आपराधिक समूह सक्रिय हुन थालेको संकेत हो । सरकारले यस्ता घटना प्रति तुरुन्त गम्भीरता देखाउनुपर्छ ।’

शर्माले देवानगञ्ज लगायतको सीमावर्ती क्षेत्रमा सुरक्षा प्रणाली सशक्त बनाउन, नियमित गस्ती बढाउन र अपराध अनुसन्धानमा विशेष टोली परिचालन गर्न सरकारसँग माग समेत गरेका छन् ।

देवानगञ्ज जस्तो खुला सिमाना भएको क्षेत्रमा यस्तो किसिमको सशस्त्र आक्रमणले स्थानीयमा त्रास फैलाएको छ । प्रहरी प्रमुख सुमन तिम्सिनाका अनुसार घटनाको यथार्थ पत्ता लगाउन विशेष अनुसन्धान टोली खटाइएको छ ।

तिम्सिनाले भने, ‘यो घटना सतही विवादको परिणामजस्तो देखिँदैन । हामी स्रोत र जड दुवै पत्ता लगाउँदैछौं ।’