विराटनगर, १२ चैत । विराटनगर महानगरपालिका–४ खार्जीस्थित यातायात कार्यालय परिसरबाट १२ जना बिचौलीयालाई पक्राउ गरिएको छ । उनीहरूलाई सेवाग्राहीलाई ठगी गरेको आरोपमा जिल्ला प्रहरी कार्यालय मोरङले पक्राउ गरेको हो ।

प्रहरीका अनुसार सेवाग्राहीहरूबाट ठगीको गुनासो आएका थिए । त्यसपछि प्रहरी अनुसन्धानमा जुटेर १२ जनालाई पक्राउ गरिएको हो । जिल्ला प्रहरी कार्यालय मोरङका प्रवक्ता डिएसपी बेदप्रकाश जोशीले पक्राउ परेका व्यक्तिहरू यातायात सेवामा बिचौलियाको भूमिका निभाउँदै आएको जानकारी दिए ।

पक्राउ परेका व्यक्तिहरूको विवरण :
१. सञ्जीव कोइराला (४१ वर्ष) – विराटनगर महानगरपालिका–३
२. राजेश खड्का (२४ वर्ष) – विराटनगर महानगरपालिका–३
३. गौरवकुमार माझी (२५ वर्ष) – विराटनगर महानगरपालिका–३
४. राजु कोइराला (३७ वर्ष) – विराटनगर महानगरपालिका–३
५. युवराज लम्साल (२७ वर्ष) – दुहबी नगरपालिका–११
६. अनिल बस्नेत (३१ वर्ष) – विराटनगर महानगरपालिका–५
७. राजीव मण्डल (२२ वर्ष) – विराटनगर महानगरपालिका–४
८. प्रवीण कुमार थन्दार (२७ वर्ष) – बर्जु गाउँपालिका–६
९. भागवत राजबंशी (३७ वर्ष) – कटहरी गाउँपालिका–१
१०. उदय कार्की (५० वर्ष) – बुढिगंगा गाउँपालिका–२
११. सुनिल दाहाल (२१ वर्ष) – बुढिगंगा गाउँपालिका–१
१२. अजयकुमार मण्डल (२९ वर्ष) – विराटनगर महानगरपालिका–३

डिएसपी जोशीले भने, ‘पक्राउ गरेका व्यक्तिहरूको अनुसन्धान जारी रहेको छ । उनीहरूले यात्रुहरूको टिकट खरिदमा बिचौलियाको भूमिका निभाएका थिए र सेवाग्राहीहरूलाई विभिन्न बहानामा ठगी गर्थे ।’ यसमा संलग्न अन्य व्यक्तिहरूको खोजी भइरहेको र बिचौलिया गतिविधिहरूलाई नियन्त्रणमा लिन कडा कारवाही प्रक्रिया अघि बढाइएको प्रहरीको भनाइ छ ।

प्रहरीका अनुसार यातायात कार्यालयसँग जोडिएका बिचौलिया गतिविधिहरूले सेवाग्राहीहरूको समय र पैसाको ठूलो क्षति पुर्याएको छ । यसलाई ध्यानमा राख्दै प्रहरीले यातायात कार्यालय परिसरमा निगरानी कडा गर्ने र अनियमित गतिविधिहरूलाई रोक्ने उद्देश्यले थप कदम चाल्ने तयारी गरेको छ ।