जनकपुरधाम, ८ चैत । चर्चित निर्देशक, लेखक र निर्माता दीपक रौनियारको बहुप्रतिक्षित फिल्म ‘राजागंज’ चैत १ गतेदेखि देशभरका हलहरूमा प्रदर्शन भइरहेको छ ।

‘राजागंज’ फिल्मको कथा मधेशको ऐतिहासिक संघर्ष, आन्दोलन र पहिचानको खोजीमा आधारित छ । यो फिल्म नेपाली सिने उद्योगको एउटा नयाँ प्रस्तुति मानिएको छ । यसमा पहिलो पटक मधेशका जनताको व्यथा र संघर्षलाई यथार्थपरक ढंगले पर्दामा उतारिएको छ । फिल्मको विशेषता भनेको मधेश आन्दोलनका वास्तविक सहभागीलाई फिल्ममा समावेश गरिएको हो ।

फिल्मका प्रमुख पात्रहरूको रूपमा इन्द्रकुमार मधेशानन्द र सरोज मास (सरोज मिश्र) प्रस्तुत भएका छन् । फिल्ममा पत्रकार घनश्याम मिश्र र आरती मण्डलले अभिनय गरेका छन् । मिश्रको यो चौथो फिल्म हो भने मण्डलले अभिनय यात्रा ‘राजागंज’ मार्फत सुरु गरेकी हुन् । यसै फिल्ममा रिंकु मिश्रलाई मधेशकी एक नेत्रीको भूमिकामा प्रस्तुत गरिएको छ ।

यस फिल्ममा चर्चित कलाकार दयाहाङ राई, विजय बराल, रिचा शर्मा, पूर्व मिस नेपाल निकिता चण्डक, पशुपति राई, जनकपुरधामका रंगकर्मी मदन ठाकुर र परमेश्वर जजबभिल जस्ता कलाकारहरूको अभिनय पनि रहेको छ ।

निर्देशक दीपक रौनियारका अनुसार ‘राजागंज’ नेपाली फिल्म उद्योगमा पृथक र महत्वपूर्ण प्रस्तुति छ । यस फिल्ममा उनले मधेशी जनताको संघर्ष, सांस्कृतिक विविधता, महिलाका चुनौतीहरू र सामाजिक–राजनीतिक परिवेशलाई यथार्थपरक रूपमा प्रस्तुत गर्ने प्रयास गरेका छन् ।

रौनियारका अनुसार, ‘यो फिल्म मधेशको मात्र कथा होइन, सम्पूर्ण नेपाली समाजको ऐना छ । हामीले मधेश आन्दोलनको पृष्ठभूमिको साथै वहाँका जनताको मनोविज्ञानलाई फिल्ममा समेटेका छौं ।’

फिल्म ‘राजागंज’ले नेपाली सिने उद्योगमा महिला पात्रलाई प्रमुख भूमिकामा प्रस्तुत गर्दै महिलालाई सहायक पात्रका रूपमा देखाउने परिपाटी तोडेको छ । यस फिल्मको मुख्य अभिनेत्री रिचा शर्माले सामाजिक सञ्जालमा सार्वजनिक गरेको भिडियोमा भनिन्,‘ यो फिल्म महिलाहरूको ’राजागंज’ बनेको छ । यो फिल्म ‘राजागंज’ भन्दा ‘रानीगंज’ हुनुपर्ने हो ।’

यद्यपि, फिल्मले मधेश र पहाडबीचको पुल बन्ने विश्वास व्यक्त गर्दै यो फिल्मले नेपाली समाजका विभिन्न पक्षहरूलाई प्रस्तुत गर्ने उद्देश्य राखेको छ । फिल्मले प्रहरीलाई नकारात्मक ढंगले मात्र नभई सकारात्मक दृष्टिकोणबाट पनि प्रस्तुत गर्ने प्रयास गरेको छ ।

यस फिल्मको अन्तर्राष्ट्रिय स्तरमा पनि चर्चा भएको छ । युरोपका विभिन्न फिल्म महोत्सवहरूमा ‘पुजा सर’ नामको महिला सशक्तिकरणको सन्देशसँगै प्रस्तुत गरिएको थियो ।