दिल्ली, ८ चैत । २०२५ को मिस वल्र्ड सौन्दर्य प्रतियोगिता भारतको तेलंगाना राज्यको राजधानी हैदराबादमा आयोजना हुने भएको छ । प्रतियोगिताको ७२ औं संस्करण मे ७ देखि ३१ सम्म हुने योजना छ ।

यसमा १२० भन्दा बढी देशका प्रतियोगीहरूको सहभागिता हुने अपेक्षा गरिएको छ । तर, तेलंगाना सरकारको यस आयोजनामा ठूलो विवाद उत्पन्न भएको छ । विशेष गरी आर्थिक खर्चको विषयमा विपक्षी दलका आलोचनाहरू उठेका छन् ।

तेलंगानाको प्रमुख दल भारत राष्ट्र समिति (बीआरएस) का कार्यकारी अध्यक्ष केटी रामा रावले प्रतियोगिता आयोजनामा लगभग २०० करोड भारु खर्च हुने अनुमान गरेका छन् । बीआरएसले कांग्रेस सरकारलाई अनावश्यक खर्चको आरोप लगाउँदै राज्य अहिले आर्थिक संकटको सामना गरिरहेको जनाएको छ ।

बीआरएसका अनुसार सरकारी कर्मचारीलाई तलब दिन समेत समस्या भइरहेको अवस्थामा यस्ता महंगे कार्यक्रमको आयोजनाले राज्यलाई थप समस्यामा पार्नेछ । विपक्षी दलको आलोचनासँगै तेलंगाना सरकारका पर्यटनमन्त्री जुपल्ली कृष्ण रावले २० मार्चको एक प्रेस सम्मेलनमा सबै आरोपहरूको स्पष्टिकरण दिए ।

उनले भने, ‘मिस वल्र्डको आयोजनामा लगभग ५४ करोड भारु खर्च हुनेछ । यो तेलंगाना सरकार र मिस वल्र्ड लिमिटेड बीच आधा आधा बाँडिनेछ । सरकारको सेयरको २७ करोड भारु प्रायोजनबाट उठाइनेछ ।’ उनले यस्ता प्रयासहरूलाई राज्यको पर्यटन प्रवर्धनको रुपमा प्रस्तुत गरे ।

तेलंगाना सरकार सचिव स्मिता सभरवालले पनि यस विवादमा प्रतिक्रिया दिँदै भनिन्, ‘हाम्रो चाहना छ कि यो प्लेटफर्ममार्फत तेलंगानाको संस्कृति र पहिचान देश मात्र नभई विदेशमा पनि प्रस्तुत होस् ।’ उनले मिस वल्र्ड प्रतियोगितालाई राज्यको धार्मिक स्थल, प्राकृतिक सौन्दर्य र हैदराबादका प्रमुख आकर्षणहरूलाई प्रस्तुत गर्ने अवसरको रुपमा व्याख्या गरिन् ।