विराटनगर, २७ फागुन । प्रधानमन्त्री केपी शर्मा ओलीले सरकारको प्राथमिकता सङ्घीय लोकतान्त्रिक गणतन्त्रलाई सुदृढ बनाउनु रहेको र मुलुकको समृद्धिको मार्गमा तीव्र गतिमा अघि बढ्न सरकार प्रतिबद्ध रहेको बताएका छन् ।

कोशी प्रदेशसभामा आज विशेष सम्बोधन गर्दै प्रधानमन्त्री ओलीले जनताको बलिदानी र सङ्घर्षको बलमा प्राप्त संविधानको रक्षा गर्दै आवश्यकतानुसार जनता र सङ्घीय लोकतान्त्रिक गणतन्त्रका पक्षमा संशोधन गर्दै जाने कुरा पनि स्पष्ट पारे ।

प्रधानमन्त्री ओलीले यो प्रणालीमा कुनै पनि व्यक्तिले प्रतिस्पर्धा गर्न सक्ने अवसर रहेको बताउँदै व्यवस्थाविरोधी आवाज उठाउनुको आवश्यकता नभएको उल्लेख गरे । उनले संविधानसम्मत, शान्तिपूर्ण र सुशासनको बाटोबाट नेपालको समृद्धि र विकासमा थप प्रगति ल्याउन सकिने बताए ।

‘हामी जनताको गरिबी र पछ्यौटेपन हटाएर जान चाहन्छौँ । गरिबी हटाएर मात्रै सन्तोष मान्दैनौँ । समग्र मानवीय जैविक र न्यायोचित आवश्यकताको परिपूर्ति गरेर मुलुकलाई अगाडि बढाउनुछ,’ प्रधानमन्त्री ओलीले आफ्नो सम्बोधनमा भने, ‘नागरिक सर्वोच्चता भएको यस प्रणालीमा रहेर समृद्धिका लागि छिटो काम गर्न चाहन्छौँ । रोजगारीका अवसरहरू सिर्जना गर्न चाहन्छौँ । त्यसअघि हामीलाई उद्यमशीलतामा जोड दिनुपर्छ । त्यसकारण देशलाई पछाडि फर्काउने होइन, अगाडि बढाउने हो । संविधानअनुसार तीनै तहका सरकारले सहकार्य गरेर देशको विकासमा लाग्नुपर्छ ।’

प्रधानमन्त्री ओलीले नेपालको भौगोलिक, सांस्कृतिक र जातीय विविधतालाई मनन गर्दै विविधता र एकता बीचको सन्तुलन कायम राख्दै नेपालको गौरवपूर्ण इतिहासलाई समृद्ध बनाउँदै विश्वमा यसको स्थान सुनिश्चित गर्न आआफ्नो स्थानबाट भूमिका निर्वाह गर्न सबै नागरिकलाई आग्रह गरे ।

यसअघि, प्रधानमन्त्री ओलीले पूर्वाञ्चल विश्वविद्यालयको १३औं दीक्षान्त समारोहलाई सम्बोधन गर्दै शिक्षाको महत्त्व र विश्वविद्यालयको योगदानलाई महत्त्वपूर्ण रहेको बताएका थिए ।