काठमाडौं, २९ माघ । चलचित्र विकास बोर्डल मधेश प्रदेशको राजधानी जनकपुरधाममा आगामी फागुन १३, १४ र १५ गते विशेष चलचित्र शिविर सञ्चालन गर्ने भएको छ ।

यो शिविरको मुख्य उद्देश्य मधेसमा चलचित्रप्रतिको अभिरुचि र चेतना जागृत गर्दै त्यहाँको चलचित्र बजारलाई विस्तार र सुदृढ बनाउनु रहेको बोर्डले जानकारी दिएको छ ।

चलचित्र विकास बोर्डका अध्यक्ष दिनेश डिसीका अनुसार यस कार्यक्रमले नेपाली तथा मातृभाषा चलचित्रको अवस्था, बजार र दर्शकहरूको रुचिको अध्ययन गर्दै मधेशमा चलचित्र क्षेत्रको प्रवद्र्धन गर्नेछ । साथै, मधेशका युवा चलचित्रकर्मीहरूलाई चलचित्र नीति र विधिबारे अभिमुखीकरण गराउनु, मौलिक कथाहरूको खोजी र चलचित्रसँग सम्बन्धित विभिन्न विषयहरूमा बहस तथा विमर्श गर्न यस शिविरको आयोजना गरिएको हो ।

अध्यक्ष डिसीले चलचित्र शिविरलाई नेपाली चलचित्र उद्योगमा दूरगामी प्रभाव पार्ने एक विशेष अभियानको रूपमा व्याख्या गरेका छन् । उनले भने, ‘यो चलचित्रमार्फत देश जोड्ने महत्त्वपूर्ण सेतु हो । समभावको संस्कृति विकास गर्दै सामाजिक–सांस्कृतिक सद्भाव, सहिष्णुता र राष्ट्रिय एकतालाई सबल बनाउन यसले मद्दत पुर्याउनेछ ।’

डिसीका अनुसार चलचित्र शिविर सामाजिक एकीकरणको प्रयास पनि हो । यसले समभावको व्यवहार र सांस्कृतिक विविधतालाई प्रोत्साहित गर्नेछ ।

चलचित्र शिविर अन्तर्गत विभिन्न कार्यक्रमहरू आयोजना गरिनेछ जसमा चलचित्र प्रदर्शन, पोष्टर तथा फोटो प्रदर्शनी, परामर्श सेवा, कार्यशाला, चलचित्र सम्बन्धी अभिमुखीकरण, अन्तरक्रिया, संवाद, संगोष्ठी र चलचित्र सम्मेलन जस्ता गतिविधिहरू समावेश हुनेछन् । यसका लागि बोर्डले चलचित्र शिविर संयोजकको रूपमा बोर्ड सदस्य केएल बुढाथोकीलाई जिम्मेवारी तोकेको छ ।

संयोजक बुढाथोकीका अनुसार चलचित्रकर्मीहरूले आफ्नो सृजनशीलता र क्षमताको विकास गर्न पाउने यो शिविरले मधेसी समाजका मौलिक तथा उत्कृष्ट कथाहरूलाई चलचित्रको माध्यमबाट उजागर गर्ने अवसर प्रदान गर्नेछ ।