वाशिङ्गटन, १६ माघ । अमेरिकी राष्ट्रपति डोनाल्ड ट्रम्पले संघीय सरकारको खर्च कटौतीको प्राथमिकता स्वरूप नयाँ प्रस्ताव ल्याएका छन् । उनले संघीय कर्मचारीहरूको संख्यामा व्यापक कटौती गर्ने उद्देश्यले लाखौं कर्मचारीलाई स्वैच्छिक राजीनामा दिन आठ महिनाको तलबसहितको विच्छेद प्याकेज प्रस्ताव गरेका छन् ।

यो प्रस्ताव कोभिड–१९ महामारीपछि लामो समयदेखि घरबाट काम गरिरहेका संघीय कर्मचारीहरूलाई कार्यालयमा पूर्णकालीन रूपमा फर्कन आदेश जारी गरिएपछि आएको हो । महामारीले कर्मचारीहरूलाई टेलिकम्युटिङको सुविधा दिएको भए पनि अब उनीहरूलाई कार्यालयमै फर्कनुपर्ने वा राजीनामा दिनुपर्ने अवस्थामा राखिएको छ ।

राष्ट्रपति ट्रम्पले आफ्नो कार्यकालमा यसलाई संघीय खर्च घटाउने ठूलो कदमको रूपमा अगाडि सारेका छन् । उनले कार्यालयमा फर्कन नचाहने लगभग सबै संघीय कामदारहरूलाई लक्षित गर्दै यो योजना प्रस्तुत गरेका हुन् । लाखौं संघीय कर्मचारीलाई इमेलमार्फत सूचित गर्दै फेब्रुअरी ६ भित्र आफ्नो निर्णय दिन आग्रह गरिएको छ ।

ट्रम्प प्रशासनले आफ्नो सन्देशमा भनेको छ, ‘यदि कर्मचारीहरूले फेब्रुअरी ६ भित्र आफ्नो जागिर छोड्न सहमति जनाए भने उनीहरूलाई विच्छेद प्याकेजको रूपमा आठ महिनाको तलब दिइनेछ ।’

संघीय सरकारले २० लाखभन्दा बढी कर्मचारीहरूलाई प्रस्ताव पठाएको छ ।, प्रशासनले करिब १०% कर्मचारीहरूले यो प्रस्ताव स्वीकार गर्ने अपेक्षा गरेको छ । अमेरिकी सञ्चारमाध्यमका अनुसार २ लाख कर्मचारीहरूले यो योजना स्वीकार गर्ने अनुमान गरिएको छ । यसले संघीय सरकारलाई ठूलो मात्रामा खर्च कटौती गर्न मद्दत गर्नेछ ।

ट्रम्प प्रशासनले यो प्रस्तावले १०० अर्ब अमेरिकी डलरसम्म (८० अर्ब पाउण्ड) सरकारी खर्चमा कटौती गर्न सक्ने बताएको छ । यो ट्रम्पको कार्यकालमा संघीय खर्च कटौतीविरुद्धको अहिलेसम्मकै ठूलो कदम मानिएको छ ।

ट्रम्पका वरिष्ठ सल्लाहकार तथा अर्बपति व्यापारी एलन मस्कले यसलाई ऐतिहासिक ‘विकल्प’ को रूपमा प्रशंसा गरेका छन् । सामाजिक सञ्जाल ‘एक्स’ मा उनले यस प्रस्तावलाई संघीय खर्चलाई प्रभावकारी रूपमा घटाउने उपायको रूपमा चित्रण गरेका छन् ।

राष्ट्रपति ट्रम्पले जनवरी २० मा आफ्नो दोस्रो कार्यकाल सुरु गरेपछि संघीय खर्च घटाउने योजनालाई प्राथमिकतामा राख्दै आएका छन् ।कर्मचारीहरूलाई राजीनामा दिन प्रोत्साहन गर्ने यो योजना उनको प्रशासनद्वारा उठाइएको सबैभन्दा ठूलो कदम हो । उनको यस कदमले संघीय प्रशासनलाई थप द्रुत र चुस्त बनाउने लक्ष्य राखेको छ ।

यस प्रस्तावले संघीय कर्मचारीहरूबीच मिश्रित प्रतिक्रिया उत्पन्न गरेको छ । केही कर्मचारीहरूले घरबाट काम गर्ने सुविधा गुम्न सक्ने भन्दै असन्तुष्टि जनाएका छन् भने केहीले भने प्रस्ताव गरिएका विच्छेद प्याकेजलाई आकर्षक मानेका छन् ।

फेब्रुअरी ६ पछि प्रस्तावलाई स्वीकार नगर्ने कर्मचारीहरूलाई कार्यालयमा पूर्णकालीन फर्किन आदेश दिइनेछ ।