काठमाडौं, २७ असोज । प्रधानमन्त्री शेरबहादुर देउवाले जनता समाजवादी पार्टी नेपालबाट सरकारमा सहभागी मन्त्रीहरुलाई बर्खास्त गरेका छन् ।

यसअघि जनता समाजवादी पार्टीले सत्तारुढ गठबन्धनमा नै रहेको भए पनि आगामि निर्वाचनमा उसले नेकपा एमालेसँग तालमेल गरेको छ ।

सत्ता गठबन्धनलाई छोडेर एमालेसँग तालमेल गर्न पुगेको जसपाका चार मन्त्री देउवा नेतृत्वको सरकारमा थिए ।

राजेन्द्र श्रेष्ठ संघीय मामिला तथा सामान्य प्रशासन, मृगेन्द्रकुमार सिंह यादव कृषि तथा पशुपंक्षी विकास, मोहम्मद इश्तियाक राई भौतिक पूर्वाधार तथा यातायात र प्रदीप यादव वन तथा वातावरण मन्त्री थिए ।

उनीहरुलाई बर्खास्त गरेपनि निर्वाचन आचारसंहिता लागिसकेकाले प्रधानमन्त्री देउवाले अन्य मन्त्री थप्न पाउने छैनन् ।

उनीहरुले सम्हालेका सबै मन्त्रालयको जिम्मेवारी देउवाले नै सम्हाल्ने गरि राष्ट्रपति विद्यादेवी भण्डारीले कार्यभार तोकेकी छन् ।