महोत्तरी, १६ साउन । महोत्तरीको बर्दिबास नगरपालिकालाई आईसुयी भेन्टिलेटर प्रदान गरिएको छ ।

स्वास्थ्य तथा जनसंख्या मन्त्रालय अन्तर्गतको स्वास्थ्य सेवा विभाग व्यवस्थापन महाशाखाले बर्दिबास नगरपालिकालाई करिब २६ लाख बराबरको आईसुयी भेन्टिलेटर हस्तान्तरण गरेको हो ।

महोत्तरी क्षेत्र नम्बर–१ का प्रतिनिधिसभा सदस्य गिरिराजमणि पोखरेलको विशेष पहलमा भेन्टिलेटर प्रदान गरिएको हो । सांसद पोखरेलले विगत लामो समयदेखि स्वास्थ्य सोवा विभागलाई भेन्टिलेटरबारे ध्यानाकर्षण गराउँदै आएका थिए ।

बर्दिबासमा भेन्टिलेटरको अभावमा सर्पदंशका बिरामीहरूको मृत्यु समेत हुँदै आएको र गम्भीर घाइतेको उपचारमा समस्या भएपछि यसको लागि पहल थालिएको थियो ।

बर्दिबासका पूर्वमेयर विदुर कुमार कार्कीले गत वर्ष नै स्वास्थ्य सेवा विभागलाई पत्राचार गरेका थिए ।

विभागले गत आर्थिक वर्षमा खरिद गरेको भेन्टिलेटर नगरप्रमुख प्रह्लाद कुमार क्षेत्रीको टिम काठमाडौँ पुगेर बुझेको हो ।