जनकपुरधाम, २४ फागुन । नेपाली कांग्रेस धनुषाको नयाँ नेतृत्वका लागि जारी मतगणनामा विमलेन्द्र निधि समूहबाट सभापतिका उम्मेदवार योगेन्द्र पजियार ४२६ मतले अगाडी रहेका छन् ।

धनुषा निर्वाचन क्षेत्र नम्बर ३ र ४ को मतगणना समाप्त भएको छ भने क्षेत्र नम्बर २ को मतगणना जारी रहेको छ । अहिलेसम्म १ हजार ९६५ मतगणना गर्दा योगेन्द्र पजियारले ९३१, सन्तोष यादवले ५०८ र दिनेश प्रसैलाले ४५७ मत प्राप्त गरेका छन् । 

मतगणनाका क्रममा सभापतिका लागि सबै भन्दा अगाडी योगेन्द्र पजियार छन् भने सन्तोष यादव देस्रो र दिनेश प्रसैला तेस्रो स्थानमा रहेका छन् ।

सोमबार अबेर राति सम्पन्न निर्वाचनको मतगणना राति नै सुरु हुने भनिएपनि विभिन्न आन्तरिक समस्याका कारण मंगलबार दिउँसोबाट सुरु भएको हो । मंगलबार रातिसम्ममा मतपरिणाम आउने निर्वाचन समितिले जनाएको छ ।

जनकपुरधामको ऐतिहासिक तिरहुतिया गाछीमा सोमबार बिहान ११ बजेदेखि सुरू भएको मतदानमा २ हजार ९१२ जनाले मतदान गरेको निर्वाचन अधिकृत अरुण ज्ञवालीले जानकारी दिए । धनुषा काँग्रेसका ३ हजार १७३ मतदाता रहेका छन् ।

धनुषा काँग्रेसको सभापतिमा ३, दुई उपसभापतिका लागि ६, दुई सचिवका लागि ९ र दुई जना सहसचिवका लागि ६ जनाले उम्मेदवारी दिएका छन् । सभापतिमा योगेन्द्र पजियार, दिनेश प्रसैला र सन्तोष यादव वीच कडा प्रतिस्पर्धा छ ।

धनुषाको क्षेत्र नम्बर १ बाट ८०१ मत मध्ये ७५३ मत, क्षेत्र नम्बर २ बाट ८३० मध्ये कुल ८०० मत, क्षेत्र नम्बर ३ बाट ७१० मध्ये ६६८ र क्षेत्र नम्बर ४ बाट ७०९ मध्ये ६९१ खसेको निर्वाचन समितिले जनाएको छ ।

निर्वाचनमा ५१ प्रतिशत मत ल्याउने उम्मेदवारले चुनाव जित्ने काँग्रेसको विधानमा व्यवस्था गरिएको छ । ५१ प्रतिशतभन्दा कम मत ल्याएमा अथवा बराबर मत ल्याएमा दोस्रो पटक निर्वाचन हुने निर्वाचन समितिले जनाएको छ ।

सभापति पदका लागि तीन जना आकांक्षी उम्मेदवारी कडा प्रतिस्पर्धा देखिएकाले दोश्रो चरणको निर्वाचन हुनसक्ने सम्भावना प्रबल रहेको काँग्रेसीजनमा चर्चा छ ।