काठमाडौं, ९ कार्तिक । नेकपा एमालेको पालिका अधिवेशन आज हुँदैछ । पार्टीको दशौं महाधिवेशनको तयारीमा रहेको एमालेले वडा अधिवेशनपछि पालिकास्तरमा अधिवेशन गर्न लागेको हो ।

सोही अनुसार आज देशभरका ७५३ पालिका स्तरका कमिटीको अधिवेशन भईरहेको छ ।

विशेष क्षेत्रअन्तर्गतका इलाकाको पनि एकैसाथ अधिवेशन हुनेछ । अधिवेशनको पार्टीका अध्यक्ष केपी शर्मा ओलीले पार्टीको केन्द्रीय कार्यालय, थापाथलीको वार रुमबाट भर्चुअल माध्यमबाट उद्घाटन गर्ने कार्यक्रम रहेको एमाले केन्द्रीय कार्यालयका सचिव शेरबहादुर तामाङले जानकारी दिए ।

एमालेको पालिका अधिवेशनका लागि प्राविधिकलगायत तयारी पूरा भएको उनले बताए । एमालेले कार्तिक ६ गते देशभरका अधिकांश वडाको अधिवेशन भएको थियो । केही स्थानमा भने बाढीपहिरोका कारण स्थगित गरिएको थियो ।

पार्टीको नयाँ विधानबमोजिम गाउँ/नगरपालिकामा ७५, उपमहानगरपालिकामा ८५ र महानगरपालिका एक सय एक सदस्यीय कार्यसमिति निर्वाचित हुनेछ ।

एमालेले महाधिवेशनमा सहभागी हुने प्रतिनिधिको मापदण्ड तय गर्न कात्तिक ११ गते स्थायी कमिटी र १२ गते केन्द्रीय कमिटीको बैठक बोलाएको छ ।

एमालेको दशौं महाधिवेशन आगामी मङ्सिर १० देखि १२ गतेसम्म चितवनमा हुँदैछ ।