रौतहट, ७ कार्तिक । रौतहटबाट ३ जना अवैध सिकारीलाई रङ्गेहात पक्राउ गरिएको छ ।

रौतहटको राष्ट्रिय वन क्षेत्रभित्र लुकीछिपी सिकार खेलिरहेको अवस्थामा सशस्त्र वन सुरक्षा टोलीले उनीहरुलाई पक्राउ गरेको हो ।

पक्राउ पर्नेमा गुजरा नगरपालिका–५ लक्ष्मीपुरका २२ वर्षीय शेख सेराज मियाँ, सोही ठाउँका १८ वर्षीय कलाम मंसुरी र २२ वर्षीय मोजाहिर मंसुरी रहेको चोंचा सेक्टर वनका अधिकृत राजेश साहले जानकारी दिए । उनीहरुले वन क्षेत्रभित्रै एकथरी संरक्षित चराको गुँडबाट १४ वटा बच्चा निकालेर मारेको आरोप लागेको छ ।

उनीहरुको साथबाट गरुडजस्तै देखिने पानीमा बस्ने माईग्रेड नामक चरा १४ वटा घाँटी रेटेर मारिएको अवस्थामा बरामद भएको अधिकृत साहले बताए । रंगपुर साझेदारी वन र चन्द्रपुर वन डिभिजन कार्यालयका वन कर्मचारीले गस्तीको क्रममा शनिबार साँझ उनीहरुलाई फेला पारी खानतलासी गर्दा मृत चराका साथै एक थान चक्कु, १५ मिटर डोरी र ३ थान साईकल बरामद भएको जनाइएको छ ।

बरामद चरा इलाका प्रहरी कार्यालय चन्द्रनिगाहपुरका प्रतिनिधि, वन कर्मचारी, चन्द्रपुर पशु सेवा शाखाका प्रतिनिधि, जनप्रतिनिधि र पत्रकारहरुको रोहवरमा डिभिजन वन कार्यालय चन्द्रनिगाहपुरको हाताभित्रै खाल्डो खनेर गाडिएको छ ।

पक्राउ परेका तीनै जनामाथि वन्यजन्तु अपराध सम्बन्धी मुद्दा चलाउने डिभिजन वन कार्यालय रौतहटका प्रमुख अमरदेव यादवले जानकारी दिए ।